തിരുവനന്തപുരം: സിപിഎം സംസ്ഥാന സെക്രട്ടേറിയറ്റ് യോഗം വെള്ളിയാഴ്‌ച നടക്കും. എ.ആര്‍.നഗര്‍ സഹകരണ ബാങ്കിലെ ക്രമക്കേടുകളിൽ ഇ.ഡി അന്വേഷണമെന്ന കെ.ടി ജലീലിന്‍റെ വിവാദ പരാമര്‍ശം ഇന്നത്തെ സെക്രട്ടേറിയറ്റ് യോഗം വിശദമായി പരിശോധിക്കും. ജലീലിന്‍റെ പരാമര്‍ശത്തില്‍ സിപിഎം ജലീലിനെ അതൃപ്‌തി അറിയിച്ചിരുന്നു. പരാമര്‍ശങ്ങളില്‍ കരുതല്‍ വേണമെന്ന സന്ദേശമാണ് സിപിഎം നല്‍കിയത്.
മുഖ്യമന്ത്രിയും പരസ്യമായി ജലീലിനെ തള്ളി രംഗത്തെത്തിയിരുന്നു. ഇതിനു പിന്നാലെ വ്യഴാഴ്‌ച ജലീല്‍ മുഖ്യമന്ത്രിയുമായി നേരിട്ട് കൂടിക്കാഴ്‌ച നടത്തിയിരുന്നു. സിപിഎം നിലപാടില്‍ നിന്ന് വ്യത്യസ്‌തമായി ഇടത് എം.എല്‍.എ നിലപാട് സ്വീകരിച്ചത് ഗൗരവമായാണ് സിപിഎം കാണുന്നത്. സമ്മേളന കാലത്തിലേക്ക് കടക്കുന്ന സാഹചര്യത്തില്‍ ഇത് സംബന്ധിച്ച് വിശദമായ ചര്‍ച്ചയും വെള്ളിയാഴ്‌ച നടക്കും.