കൊവിഡ് മരണം സംബന്ധിച്ച പട്ടിക പുതുക്കുമെന്ന് ആരോഗ്യ മന്ത്രി

അർഹരായവർക്ക് ധനസഹായം നിഷേധിക്കപ്പെടില്ലെന്ന് ആരോഗ്യ മന്ത്രി വീണ ജോർജ് പറഞ്ഞു.

തിരുവനന്തപുരം: സംസ്ഥാനത്തെ കൊവിഡ് മരണങ്ങൾ സംബന്ധിച്ച പട്ടിക പുതുക്കുമെന്ന് ആരോഗ്യമന്ത്രി വീണ ജോർജ്. അർഹരായവർക്ക് ധനസഹായം നിഷേധിക്കപ്പെടില്ല. കൊവിഡ് ബാധിച്ച് മരിച്ചവരുടെ മരണ പട്ടിക സമഗ്രമായി പുതുക്കുമെന്നും മന്ത്രി വ്യക്തമാക്കി.

കൊവിഡ് മരണം റിപ്പോർട്ട് ചെയ്യുന്നതിൽ സംസ്ഥാനത്തിന് വീഴ്‌ച പറ്റിയെന്ന് നേരത്തെ പ്രതിപക്ഷ പാർട്ടികൾ ആരോപണമുന്നയിച്ചിരുന്നു. കൊവിഡ് മരണം കണക്കാക്കുന്ന രീതിയും ആളുകളെ പട്ടികയിൽനിന്ന് ഒഴിവാക്കുന്നതുമാണ് വിമർശനത്തിന് ഇടയാക്കിയത്.

കേന്ദ്രം പുറത്തിറക്കിയ മാർഗരേഖയുടെ അടിസ്ഥാനത്തിൽ പട്ടിക പുതുക്കുന്നതോടെ കൊവിഡ് മരണം സംബന്ധിച്ച് സർക്കാരിനെതിരെ ഉയർന്ന ആക്ഷേപങ്ങൾ പരിഹരിക്കപ്പെടാൻ ആവുമെന്ന വിലയിരുത്തലിലാണ് ആരോഗ്യവകുപ്പ്.