തിരയില്‍പെട്ട് കൂറ്റന്‍ ബോട്ട് കരയിലേക്ക് ഇടിച്ചുകയറി

കന്യാകുമാരി ജില്ലയിലെ കുളച്ചൽ വാണിയക്കുടി സ്വദേശി വ്യാകപൂവിന്‍റെ രക്ഷകൻ എന്ന ബോട്ടാണ് കഠിനംകുളം മര്യനാട് തീരത്തേക്ക് ഇടിച്ചുകയറിയത്

തിരുവനന്തപുരം: ശക്തമായ തിരയില്‍പെട്ട് കൂറ്റന്‍ മത്സ്യബന്ധനബോട്ട് കഠിനംകുളം മര്യനാട് തീരത്തേക്ക് ഇടിച്ചുകയറി. കന്യാകുമാരി ജില്ലയിലെ കുളച്ചൽ വാണിയക്കുടി സ്വദേശി വ്യാകപൂവിന്‍റെ രക്ഷകൻ എന്ന ബോട്ടാണ് ഇന്നലെ വെളുപ്പിന് മര്യനാട് തീരത്തേക്ക് ഇടിച്ച് കയറിയത്. ബോട്ട് കടലിൽ ഇറക്കാൻ പുലർച്ചെ മുതൽ നടത്തിവരുന്ന പരിശ്രമങ്ങളെല്ലാം പൂർണ്ണമായും പരാജയപ്പെട്ട അവസ്ഥയാണ്.

കുളച്ചലിൽ നിന്ന് മൂന്ന് ബോട്ടുകളെത്തിച്ച് തീരത്തേക്ക് ഇടിച്ചുകയറിയ ബോട്ടിന്‍റെ പുറക് വശത്ത് കൂടി വടം കെട്ടി കടലിലിറക്കാന്‍ ശ്രമിച്ചെങ്കിലും ഫലവത്തായില്ല. ബോട്ടിന്‍റെ പ്രൊപെല്ലർ മണലിൽ താഴ്‌ന്ന അവസ്ഥയിലാണ്. ഈ സാഹചര്യത്തിൽ കയറ് കൊണ്ട് കെട്ടിവലിച്ചാൽ പ്രൊപെല്ലര്‍ തകരാറിലാകാന്‍ സാധ്യതയുണ്ട്.