നാടുകാണി ചുരത്തിൽ ഗതാഗതം പുനസ്ഥാപിച്ചു

നിലമ്പൂർ എംഎൽഎ പിവി അൻവർ പൊതുമരാമത്ത് മന്ത്രിയുമായി നടത്തിയ ചര്‍ച്ചക്ക് ശേഷമാണ് റോഡ് തുറന്നുകൊടുത്തത്.

മലപ്പുറം: ഉരുള്‍പ്പൊട്ടലില്‍ തകര്‍ന്ന നാടുകാണി ചുരത്തില്‍ ഗതാഗതം പുനസ്ഥാപിച്ചു. നിലമ്പൂർ എംഎൽഎ പിവി അൻവർ പൊതുമരാമത്ത് മന്ത്രിയുമായി നടത്തിയ ചര്‍ച്ചയ്ക്ക് ശേഷമാണ് റോഡ് തുറന്നുകൊടുത്തത്. താഴ്ന്ന ഭാഗങ്ങള്‍ മെറ്റൽ പാകി ഗതാഗത യോഗ്യമാക്കി ഒറ്റവരിയിലൂടെ വാഹനങ്ങൾക്ക് പോകുവാനുള്ള സംവിധാനമാണ് ഒരുക്കിയിരിക്കുന്നത്. അതേസമയം ചരക്ക് വാഹനങ്ങള്‍ക്ക് നിരോധനം തുടരും. ഗതാഗത നിരോധന ബോർഡുകൾ മാറ്റി ജാഗ്രതാ നിർദേശ ബോർഡുകളും സ്ഥാപിച്ചു.

25 മീറ്റർ ദൂരത്തിലും നാലര മീറ്റർ വീതിയിലും ചുരത്തിന്‍റെ ഇടതുവശം നവീകരിച്ചിട്ടുണ്ട്. കഴിഞ്ഞ ദിവസം നിര്‍മാണ പുരോഗതി വിലയിരുത്താന്‍ പൊതുമരാമത്ത് വകുപ്പിന്‍റെ അവലോകന യോഗം ചേര്‍ന്നിരുന്നു. നാടുകാണി ചുരം വിദഗ്ധസംഘം സന്ദർശിക്കാനും ധാരണയായിട്ടുണ്ട്.