മലപ്പുറം: പി.വി.അൻവർ എംഎല്‍എ ഘാനയിലെ ജയിലിലാണെന്ന എന്ന കോൺഗ്രസ് മുഖപത്രത്തിലെ വാര്‍ത്തയ്‌ക്ക് മറുപടിയുമായി പി.വി.അൻവർ എംഎൽഎ. ഫെയ്‌സ്‌ ബുക്ക് പേജിലൂടെയാണ് അൻവറിന്‍റെ മറുപടി. തന്നെ പരമാവധി തേജോവധം ചെയ്യാനും സാമ്പത്തികമായി തകർക്കാനും ശ്രമിച്ചവരാണ് ഇപ്പോൾ തന്നെ കാണാനില്ലെന്ന പരാതിയുമായി രംഗത്തു വന്നവരെന്നും അൻവര്‍ ആരോപിച്ചു.
ഒരു രാഷ്ട്രീയകാരൻ എന്ന പോലെ തന്നെ ഒരു ബിസിനസുകാരൻ കൂടിയാണ് താൻ. ബിസിനസ് ആവശ്യത്തിനാണ് ആഫ്രിക്കയിൽ എത്തിയത്. തന്നെ സ്നേഹിക്കുന്ന നിലമ്പൂരിലെ ജനങ്ങളെയും പാർട്ടിയേയും ബോധ്യപ്പെടുത്തിയാണ് ആഫ്രിക്കയിലേക്ക് വന്നത്. നിയമസഭയുടെ അവസാന സമ്മേളനത്തിൽ പങ്കെടുക്കാൻ പുറപ്പെടാൻ നിൽക്കെ നടത്തിയ പരിശോധനയിലാണ് കൊവിഡ് സ്ഥീരികരിച്ചതെന്നും അൻവര്‍ പറഞ്ഞു.
ആര്യാടൻമാരോടും തന്നെ തകർക്കാൻ ശ്രമിക്കുന്ന യൂത്ത് കോൺഗ്രസുകാരും പറഞ്ഞിട്ടല്ല ഞാൻ നിലമ്പൂരിലേക്ക് വന്നത്. നിലമ്പൂരിലെ ജനങ്ങൾക്കൊപ്പം നിന്ന് കഴിഞ്ഞ അഞ്ച് വർഷത്തിനിടയിൽ നിലമ്പൂരിലേക്ക് മുൻകാലങ്ങളെ മറികടന്ന് വികസനം എത്തിച്ചു. നിലമ്പൂരിൽ വീണ്ടും പോരാട്ടത്തിന് താൻ ഉണ്ടാകുമെന്ന സന്ദേശമാണ് അൻവർ നൽകുന്നത്. രാഷ്ട്രീയം എനിക്ക് പണം സമ്പാദനത്തിനല്ല ജനങ്ങളെ സഹായിക്കാനാണ് അത് അവർക്ക് അറിയാം. നിലമ്പൂരിലെ ജനങ്ങളും പാർട്ടിയും ഒപ്പം ഉണ്ടെന്നും ഉടൻ നിലമ്പൂരിലെത്തുമെന്നും പറഞ്ഞാണ് അൻവർ തന്‍റെ വീഡിയോ സന്ദേശം അവസാനിപ്പിക്കുന്നത്.