കോട്ടയം: ചലച്ചിത്ര സംവിധായകൻ എന്ന വ്യാജേന വിദ്യാർഥിയോട് അപമര്യാദയായി പെരുമാറിയ ആള്‍ പിടിയില്‍. മല്ലപ്പള്ളി കൈപ്പാട് ആലുംമൂട്ടിൽ രാജേഷ് ജോർജ് ആണ് അറസ്റ്റിലായത്. ശനിയാഴ്‌ച പാലാ മുരുക്കുംപുഴയിലാണ് സംഭവം.
15 വയസുകാരിയെ കടയിൽ ഇരുത്തിയ ശേഷം അമ്മ പുറത്തുപോയ സമയത്താണ് രാജേഷ് ഫോണിൽ സംസാരിച്ചു കൊണ്ട് കടയിലേക്ക് വന്നത്. പെൺകുട്ടിയുടെ അമ്മയെയാണ് വിളിക്കുന്നതെന്ന് തെറ്റിദ്ധരിപ്പിച്ച പ്രതി സംവിധായകനാണെന്നും പുതിയ സിനിമയിൽ നായികയെ ആവശ്യമുണ്ടെന്നും പെണ്‍കുട്ടിയോട് പറഞ്ഞു.
ഇയാളുടെ പെരുമാറ്റത്തില്‍ സംശയം തോന്നിയ പെണ്‍കുട്ടി കടയില്‍ നിന്ന് പുറത്തേക്ക് ഇറങ്ങി ഓടി. ഇതിനിടെ രാജേഷ് കടന്ന് കളയുകയായിരുന്നു. പരാതി ലഭിച്ച ഉടൻ മൂന്ന് ടീമായി തിരിഞ്ഞ് പൊലീസ് അന്വേഷണം ആരംഭിച്ചു.