എറണാകുളം: അയിരൂർ പാടത്ത് വൃദ്ധദമ്പതികളെ തലക്കടിച്ച് കവർച്ച നടത്താൻ ശ്രമിച്ച കേസിലെ പ്രതികളെ പിടികൂടിയ പൊലീസ് ഉദ്യോഗസ്ഥരെ ആദരിച്ച് കോതമംഗലം ടൗൺ വ്യാപാരി വ്യവസായി ഏകോപന സമിതി. കോതമംഗലം പൊലീസ് സ്റ്റേഷനിലെ സിഐ യൂനസ്, എസ്ഐ ദിലീഷ് എന്നിവരെയും അന്വേഷണ സംഘത്തിലുണ്ടായിരുന്ന 14 അംഗ ഇൻവെസ്റ്റിഗേഷൻ ടീമിനെയുമാണ് വ്യാപാരികൾ ആദരിച്ചത്.
കേരള സംസ്ഥാന വ്യാപാരി വ്യവസായി ഏകോപന സമിതിയുടെ കോതമംഗലം ടൗൺ യൂണിറ്റ് സമ്മേളനവും ഓഫീസ് ഉദ്ഘാടനവും നടന്ന ചടങ്ങിലായിരുന്നു ആദരം. വ്യാപാരി സമിതി യൂണിറ്റ് ജില്ലാ സെക്രട്ടറി സി.കെ.ജലീൽ സമ്മേളനം ഉദ്ഘാടനം നിർവഹിച്ചു. പ്രസിഡന്‍റ് കെ.എ.കുര്യാക്കോസ് അദ്ധ്യക്ഷനായി. വ്യാപാരികളെ ബുദ്ധിമുട്ടിക്കുന്ന ഹർത്താലിനെതിരെ പ്രതികരിക്കണമെന്ന് വ്യാപാരി സമിതി യൂണിറ്റ് ജില്ലാ സെക്രട്ടറി സി.കെ.ജലീൽ പറഞ്ഞു. വിദ്യാഭ്യാസ രംഗത്ത് മികച്ച നേട്ടങ്ങൾ കൈവരിച്ച സമിതി അംഗങ്ങളുടെ മക്കൾ, മുതിർന്ന വ്യാപാരികൾ തുടങ്ങിയവരെയും ചടങ്ങില്‍ ആദരിച്ചു.