എറണാകുളം: മുസ്ലിംലീഗ് നേതാവ് കുഞ്ഞാലിക്കുട്ടിക്കെതിരായ കള്ളപ്പണ ആരോപണത്തിൽ തെളിവ് നൽകാൻ കെ.ടി ജലീൽ ഇന്ന് എൻഫോഴ്സ്മെന്‍റ് ഡയറക്ട്രേറ്റിന് മുന്നിൽ ഹാജരാകും. വൈകുന്നേരം നാല് മണിയോടെ കൊച്ചിയിലെ ഇ.ഡി ഓഫീസിൽ എത്തിയാണ് അദ്ദേഹം തെളിവ് നൽകുക.
കഴിഞ്ഞയാഴ്‌ച ഇഡി ഓഫിസിൽ ഹാജരായി അദ്ദേഹം മൊഴി നൽകുകയും ചില തെളിവുകൾ നൽകുകയും ചെയ്തിരുന്നു. ഇതിന്‍റെ തുടർച്ചയായാണ് കൂടുതൽ രേഖകൾ സമർപ്പിക്കാൻ ഇ.ഡി ജലീലിനോട് ആവശ്യപ്പെട്ടത്. കുഞ്ഞാലിക്കുട്ടിക്കെതിരായ ആരോപണത്തിൽ കൂടുതൽ വ്യക്തത വരുത്തുകയാണ് ഇ.ഡിയുടെ ലക്ഷ്യം.
കുഞ്ഞാലിക്കുട്ടിയെയും മകനെയും ചോദ്യം ചെയ്യാൻ ഇ.ഡി നോട്ടീസ് നൽകിയിരുന്നുവെങ്കിലും ഇരുവരും സാവകാശം തേടിയിരിക്കുകയാണ്. ചന്ദ്രിക പത്രത്തിലെ മറ്റു പലരുമായി ബന്ധപ്പെട്ട സാമ്പത്തിക സ്രോതസുകളെ കുറിച്ചുള്ള വിവരങ്ങളും ഇ.ഡിക്ക് നൽകിയിട്ടുണ്ടെന്ന് കെ.ടി ജലീൽ തന്നെ വ്യക്തമാക്കിയിരുന്നു.