രണ്ടാം വരവില്‍ മോദിയുടെ ആദ്യ വിദേശയാത്ര മാലിദ്വീപിലേക്ക്
ജൂണ്‍ പകുതിയോടെയാണ് മോദി മാലിദ്വീപ് സന്ദര്‍ശിക്കുക. ഇന്ത്യയും മാലിദ്വീപും തമ്മിലുള്ള ഉഭയകക്ഷി ചര്‍ച്ചകള്‍ക്കായാണ് നരേന്ദ്രമോദി മാലിദ്വീപില്‍ എത്തുന്നത്.
പ്രധാനമന്ത്രി പദത്തിൽ തുടര്‍ച്ചയായി രണ്ടാംതവണ എത്തുന്ന നരേന്ദ്രമോദിയുടെ ഇത്തവണത്തെ ആദ്യ വിദേശയാത്ര മാലിദ്വീപിലേക്ക്. ജൂണ്‍ പകുതിയോടെയാണ് മാലിദ്വീപ് സന്ദര്‍ശിക്കുക എന്ന് നയതന്ത്ര ഉദ്യോഗസ്ഥരെ ഉദ്ധരിച്ച് വാര്‍ത്താ ഏജന്‍സിയായ പി.ടി.ഐ റിപ്പോര്‍ട്ട് ചെയ്തു. എന്നാൽ ജൂൺ ആദ്യവാരം മോദി സന്ദർശനം നടത്തുമെന്നാണ് മാലിദ്വീപ് മാധ്യമങ്ങൾ റിപ്പോർട്ട് ചെയ്തത്. ഇന്ത്യയും മാലിദ്വീപും തമ്മിലുള്ള ഉഭയകക്ഷി ചര്‍ച്ചകള്‍ക്കായാണ് നരേന്ദ്രമോദി മാലിദ്വീപില്‍ എത്തുന്നത്. ലോക്‌സഭ തെരഞ്ഞെടുപ്പില്‍ മികച്ച വിജയത്തോടെ വീണ്ടും അധികാരത്തിലെത്തിയ നരേന്ദ്രമോദിയെ മാലിദ്വീപ് പ്രസിഡന്‍റ് ഇബ്രാഹിം മുഹമ്മദ് സ്വാലിഹ് അഭിനന്ദനമറിയിച്ചിരുന്നു.
2014-ല്‍ മോദി പ്രധാനമന്ത്രിയായി അധികാരമേറ്റതിന് ശേഷമുളള ആദ്യ വിദേശയാത്ര ഭൂട്ടാനിലേക്കായിരുന്നു. 2018 നവംബറില്‍ മാലദ്വീപ് പ്രസിഡന്‍റ് ഇബ്രാഹിം മുഹമ്മദ് സ്വാലിഹിന്‍റെ സ്ഥാനാരോഹണ ചടങ്ങില്‍ മോദി പങ്കെടുത്തിരുന്നു.