'കെയർ ഹോം''പദ്ധതി : പൂർത്തിയായ മൂന്ന് വീടുകളുടെ താക്കോൽദാനം നടത്തി

ഇരുപത്തിയാറോളം വീടുകളാണ് ചെങ്ങന്നൂർ താലൂക്കിൽ കെയർ ഹോം പദ്ധതി പ്രകാരം നിർമിച്ചുനൽകുന്നത്.

ആലപ്പുഴ : പ്രളയത്തിൽ വീട് നഷ്ടപ്പെട്ടവർക്കായി സംസ്ഥാന സഹകരണ വകുപ്പ് ആവിഷ്‌കരിച്ച കെയർ ഹോം പദ്ധതിയിലൂടെ നിർമ്മിച്ച മൂന്ന് വീടുകളുടെ താക്കോൽദാനം ചെങ്ങന്നൂർ എം.എൽ.എ സജി ചെറിയാൻ നിർവഹിച്ചു. ബുധനൂർ ഗ്രാമപഞ്ചായത്തിലെ കിഴക്കേതിൽ തങ്കമ്മ, പാണ്ടനാട് ഗ്രാമപഞ്ചായത്തിലെ പുത്തൻവീട്ടിൽ ടി. എം ഭാസ്‌കകരൻ, തിരുവൻവണ്ടൂർ ഗ്രാമപഞ്ചായത്തിലെ പുതിയറ വീട്ടിൽ ദീപാ കുമാരി എന്നിവർക്കാണ് വീടുകൾ നൽകിയത്. സംസ്ഥാന സർക്കാരിന്‍റെ ലൈഫ് മിഷൻ പദ്ധതിയുടെ മാനദണ്ഡങ്ങളിൽ ഉൾപ്പെടാൻ കഴിയാതെ പോയവരെ കണ്ടെത്തി ജില്ലാ ഭരണകൂടം നിർദേശിച്ചവർക്കാണ് സഹകരണ വകുപ്പ് വഴി വീട് നൽകിയത്. കിടപ്പുമുറികൾ, ഹാൾ ,അടുക്കള, ശുചിമുറി, സിറ്റൗട്ട്, എന്നിവ ഉൾപ്പെടെയുള്ള 500 സ്‌ക്വയർ ഫീറ്റിൽ കുറയാതെയുള്ള വീടുകളാണ് നിർമ്മിച്ചു നൽകിയത്. ഇരുപത്തിയാറോളം വീടുകളാണ് ചെങ്ങന്നൂർ താലൂക്കിൽ കെയർ ഹോം പദ്ധതി പ്രകാരം നിർമിച്ചുനൽകുന്നത്.