പുണ്യമാസം നല്‍കുന്നത് നേരായ പാതയിലൂടെ മുന്നേറാനുള്ള സന്ദേശം: കാന്തപുരം

ആത്മാവിന്‍റെ വിശുദ്ധിയാണ് പ്രധാനമെന്നും കാന്തപുരം

മലപ്പുറം: എല്ലാത്തരം തിന്മകളിൽ നിന്നും മാറി നേരായ പാതയിലൂടെ മുന്നേറാനുള്ള സന്ദേശമാണ് പുണ്യമാസം നൽകുന്നതെന്ന് കാന്തപുരം എ പി അബൂബക്കര്‍ മുസ്ലിയാര്‍. മലപ്പുറം സ്വലാത്ത് നഗറിൽ നടന്ന പ്രാർഥനാ സമ്മേളന സമാപന സംഗമം ഉദ്ഘാടനം ചെയ്യുകയായിരുന്നു അദ്ദേഹം. ആത്മാവിന്‍റെ വിശുദ്ധിയാണ് പ്രധാനം. ശരീരേച്ഛകൾക്കു പിന്നാലെ പായുന്നവർ ആത്യന്തികമായി നാശത്തിലേക്കാണ് പോകുന്നതെന്നും അദ്ദേഹം പറഞ്ഞു.

ലൈലത്തുൽ ഖദ്‌റിന്‍റെ പുണ്യം തേടി നിരവധി വിശ്വാസികൾ സ്വലാത്ത് നഗറിലെ പ്രാര്‍ഥനാ സമ്മേളനത്തില്‍ പങ്കെടുത്തു. റമദാനിലെ അവസാന വെള്ളിയാഴ്ചയും 27-ാം രാവും സംഗമിച്ച വിശുദ്ധ ദിനത്തെ ധന്യമാക്കാൻ രാജ്യത്തിന്‍റെ നാനാഭാഗങ്ങളിൽ നിന്നും പതിനായിരങ്ങളാണ് ഒഴുകിയെത്തിയത്. മഅ്ദിൻ ചെയർമാൻ സയ്യിദ് ഇബ്‌റാഹീമുൽ ഖലീൽ അൽ ബുഖാരി സന്ദേശ പ്രഭാഷണവും പ്രാർത്ഥനയും നിർവഹിച്ചു.