ന്യൂഡൽഹി: ജമ്മു കശ്മീരിന് പ്രത്യേക അധികാരങ്ങള്‍ നല്‍കുന്ന ആർട്ടിക്കിൾ 370 റദ്ദാക്കിയതിനെതിരായ പ്രക്ഷോഭം തുടരുമെന്ന് വ്യക്തമാക്കി നാഷണല്‍ കോണ്‍റൻസ്. പുതിയ മാറ്റങ്ങള്‍ അംഗീകരിക്കില്ലെന്നും ഇതിനെതിരെ പോരാടുമെന്നും പ്രധാനമന്ത്രി നരേന്ദ്ര മോദിയുമായുള്ള ജമ്മു കശ്മീർ നേതാക്കളുടെ യോഗത്തിൽ അറിയിച്ചതായി നാഷണല്‍ കോണ്‍ഫറൻസ് നേതാക്കള്‍ വ്യക്തമാക്കി.
പ്രധാനമന്ത്രിയുമായുള്ള സർവകക്ഷി യോഗത്തിന് ശേഷം മാധ്യമങ്ങളോട് സംസാരിക്കവെ എൻസി നേതാവ് ഒമർ അബ്ദുല്ലയാണ് ഇക്കാര്യം വ്യക്തമാക്കിയത്. കശ്‌മീര്‍ വിഷയത്തില്‍ കേന്ദ്ര സര്‍ക്കാര്‍ കാണിച്ചത് വിശ്വാസ ലംഘനമാണ്. മേഖലയെ പഴയ പോലെ പുനസ്ഥാപിക്കേണ്ടത് കേന്ദ്ര സർക്കാരിന്‍റെ കടമയാണെന്നും അദ്ദേഹം പറഞ്ഞു.