ഹൗറ (പശ്ചിമ ബംഗാള്‍) : ട്രെയിനില്‍ ബംഗ്ലാദേശി യുവതിക്ക് സുഖപ്രസവം. യുവതിയെ ആശുപത്രിയില്‍ എത്തിക്കുന്നതിനുവേണ്ടി, ഷെഡ്യൂള്‍ ചെയ്യാത്ത റെയില്‍വേ സ്റ്റേഷനില്‍ ട്രെയിന്‍ നിര്‍ത്തി ഇന്ത്യന്‍ റെയില്‍വേയുടെ കരുതല്‍. മുംബൈ-ഹൗറ മെയിലില്‍ ശനിയാഴ്‌ചയാണ് ബംഗ്ലാദേശ് സത്‌ഖിര ജില്ല സ്വദേശിയായ മഞ്ജില ഖാത്തൂണ്‍ പെണ്‍കുഞ്ഞിന് ജന്മം നല്‍കിയത്.
മഞ്ജിലയെ ആശുപത്രിയില്‍ എത്തിക്കുന്നതിനായി പശ്ചിമ ബംഗാളിലെ ഹൗറ ജില്ലയിലെ ബഗ്‌നാന്‍ സ്റ്റേഷനില്‍ ആണ് ട്രെയിന്‍ നിര്‍ത്തിയത്. യുവതിയുടെയും കുഞ്ഞിന്‍റെയും മെഡിക്കല്‍ ആവശ്യം കണക്കിലെടുത്ത് ദീര്‍ഘദൂര ട്രെയിന്‍ സര്‍വീസ് ആയിരുന്നിട്ടുകൂടി ഷെഡ്യൂള്‍ ചെയ്യാത്ത സ്റ്റേഷനില്‍ നിര്‍ത്താന്‍ അധികൃതര്‍ നിര്‍ദേശം നല്‍കുകയായിരുന്നു. ട്രെയിന്‍ ബഗ്‌നാന്‍ സ്റ്റേഷനില്‍ നിര്‍ത്തുക മാത്രമല്ല, പാസഞ്ചേഴ്‌സ് അസോസിയേഷന്‍റെ സഹായത്തോടെ സ്റ്റേഷന് പുറത്ത് റെയില്‍വേ അധികൃതര്‍ ആംബുലന്‍സ് സൗകര്യം ക്രമീകരിക്കുകയും ചെയ്‌തിരുന്നു. യുവതിയേയും കുഞ്ഞിനെയും പ്രാദേശിക നഴ്‌സിങ് ഹോമിലേക്ക് മാറ്റിയതായി ആര്‍പിഎഫ് അറിയിച്ചു.
മഞ്ജില ഖാത്തൂണും ഭര്‍ത്താവ് റെസൗള്‍ ഗാസിയും ചികിത്സാര്‍ഥം മുംബൈയില്‍ എത്തിയതായിരുന്നു. ഇവിടെ നിന്ന് മടങ്ങും വഴിയാണ് സംഭവം. ബംഗാളിലെ പശ്ചിമ മേദിനിപൂര്‍ ജില്ലയിലെ ഖരഗ്‌പൂര്‍ സ്റ്റേഷനില്‍ നിന്ന് ട്രെയിന്‍ പുറപ്പെട്ടതിന് ശേഷമാണ് മഞ്ജിലയ്‌ക്ക് പ്രസവ വേദന അനുഭവപ്പെട്ടത്.
മറ്റ് യാത്രക്കാരില്‍ നിന്ന് ഈ വിവരം അറിഞ്ഞ ടിക്കറ്റ് എക്‌സാമിനര്‍ അക്കാര്യം ബന്ധപ്പെട്ട അധികൃതരുടെ ശ്രദ്ധയില്‍പ്പെടുത്തി. യുവതിയുടെയും കുഞ്ഞിന്‍റെയും ആരോഗ്യനില തൃപ്‌തികരമാണ്. കുഞ്ഞിന് മാസം തികയാത്തതിനാൽ മെച്ചപ്പെട്ട ചികിത്സയ്ക്കായി അവരെ കൊൽക്കത്തയിലെ ആശുപത്രിയിലേക്ക് മാറ്റിയതായി നഴ്‌സിങ് ഹോം അധികൃതര്‍ അറിയിച്ചു. മാനുഷിക പരിഗണനയുടെ അടിസ്ഥാനത്തിലാണ് ട്രെയിൻ ഷെഡ്യൂൾ ചെയ്യാത്ത സ്റ്റേഷനിൽ നിർത്താൻ തീരുമാനിച്ചതെന്ന് ബഗ്‌നാൻ സ്റ്റേഷനിലെ ഉദ്യോഗസ്ഥര്‍ അറിയിച്ചു.