ആരാധകരുടെ നീണ്ട കാത്തിരിപ്പിന് ശേഷം സ്റ്റൈല് മന്നന്‍ രജനികാന്തിന്‍റെ ജയിലര്‍ റിലീസിനൊരുങ്ങുകയാണ്. ഓഗസ്റ്റ് 10ന് തിയേറ്ററുകളിലെത്തുന്ന ചിത്രത്തിന്‍റെ ബുക്കിങ് ആരംഭിച്ചു. നിര്‍മാതാക്കളായ സണ്‍ പിക്‌ചേഴ്‌സാണ് അഡ്വാന്‍സ് ബുക്കിങ് ആരംഭിച്ച വിവരം ആരാധകരെ അറിയിച്ചിരിക്കുന്നത്. രജനികാന്തിന്‍റെ പുതിയ പോസ്‌റ്ററിനൊപ്പമാണ് നിര്‍മാതാക്കള്‍ ഇക്കാര്യം ട്വിറ്ററില്‍ പങ്കുവച്ചത്.
കഴിഞ്ഞ ദിവസം (ഓഗസ്റ്റ് 5) 'ജയിലറി'ലെ പുതിയ ഗാനം പുറത്തിറങ്ങിയിരുന്നു. ചിത്രത്തിലെ 'രഥമാരേ' എന്ന ഗാനത്തിന്‍റെ ലിറിക്കല്‍ വീഡിയോ ആണ് നിര്‍മാതാക്കള്‍ പുറത്തുവിട്ടത്. കുടുംബ പശ്ചാത്തലത്തില്‍ വളരെ വൈകാരികമായ സന്തോഷ നിമിഷങ്ങള്‍ ഉള്‍ക്കൊള്ളിച്ചുള്ളതാണ് ഗാനം.
രജനികാന്ത്, രമ്യ കൃഷ്‌ണന്‍, വസന്ത് രവി, മിർണ, ബാലതാരം റിത്വിക് എന്നിവരാണ് 4.12 മിനിറ്റ് ദൈര്‍ഘ്യമുള്ള ഗാന രംഗത്തില്‍. ഒരു കൊച്ചു സന്തോഷ കുടുംബത്തിലെ കുടുംബനാഥനായാണ് 'രഥമാരേ'യില്‍ രജനികാന്ത് പ്രത്യക്ഷപ്പെടുന്നത്. സംവിധായകൻ വിഘ്നേഷ് ശിവനാണ് ഈ മനോഹര ഗാനം രചിച്ചിരിക്കുന്നത്. അനിരുദ്ധ് രവിചന്ദറുടെ സംഗീത്തില്‍ വിശാൽ മിശ്രയാണ് ഗാനാലാപനം.
'ജയിലറി'ലെ പുതിയ പോസ്‌റ്ററും നിര്‍മാതാക്കള്‍ പുറത്തുവിട്ടു. കന്നഡ സൂപ്പര്‍താരം ശിവ രാജ്‌കുമാറും രജനികാന്തുമാണ് പുതിയ പോസ്‌റ്ററില്‍. പോസ്‌റ്ററില്‍ ഇരുതാരങ്ങളും പരസ്‌പരം മുഖത്തോട് മുഖം നോക്കി നില്‍ക്കുന്നതാണ് കാണാനാവുക. ഓഗസ്റ്റ് 10ന് പ്രേക്ഷകര്‍ക്ക് മുമ്പിലെത്താന്‍ രജനിയുടെ ടൈഗർ മുത്തുവേൽ പാണ്ഡ്യൻ ഒരുങ്ങിക്കഴിഞ്ഞു.
അതേസമയം കഴിഞ്ഞ ദിവസവും ചിത്രത്തിലെ മറ്റൊരു പോസ്റ്റര് നിര്‍മാതാക്കള്‍ പങ്കുവച്ചിരുന്നു. ഒരേ ഫ്രെയിമില്‍ ഇരിക്കുന്ന രജനികാന്തും മോഹൻലാലുമായിരുന്നു പോസ്‌റ്ററില്‍. ഒരു സോഫയില്‍ ഇരുന്ന് ഇരുവരും സംസാരിക്കുന്നതാണ് കാണാനാവുക.
'സൂപ്പര്‍സ്‌റ്റാര്‍ - ലാലേട്ടന്‍. യാരെല്ലാം ഇന്ധ കോംബോ പാക്ക വെയ്റ്റിങ്?' ജയിലർ തിയേറ്ററുകളിൽ എത്താൻ ഇനി അഞ്ച് ദിവസം! ഓഗസ്റ്റ് 10 മുതല്‍ ജയിലര്‍ തിയേറ്ററുകളില്‍' -ഇപ്രകാരമായിരുന്നു പോസ്റ്റര് പങ്കുവച്ച് സണ്‍ പിക്‌ചേഴ്‌സ് ട്വിറ്ററില്‍ കുറിച്ചത്.