മുംബൈ: 'ദി കേരള സ്റ്റോറി' സിനിമയുടെ അണിയറ പ്രവര്‍ത്തകന് ഭീഷണി സന്ദേശം ലഭിച്ചതായി പരാതി. അജ്ഞാത ഫോണ്‍ നമ്പറില്‍ നിന്നാണ് സന്ദേശം ലഭിച്ചിരിക്കുന്നത് എന്ന് മുംബൈ പൊലീസ് പറഞ്ഞു. 'ദി കേരള സ്റ്റോറി' സംവിധായകന്‍ സുദീപ്‌തോ സെന്‍ ആണ് ഭീഷണിയെ കുറിച്ച് പൊലീസില്‍ അറിയിച്ചത്.
സിനിമയിലൂടെ ഒരു നല്ലകാര്യവും കാണിച്ചിട്ടില്ലെന്നും വീട്ടില്‍ നിന്ന് പുറത്തിറങ്ങരുതെന്നുമാണ് സന്ദേശത്തില്‍ പറഞ്ഞതെന്ന് പൊലീസ് വ്യക്തമാക്കി. സന്ദേശം ലഭിച്ച വ്യക്തിക്ക് മുംബൈ പൊലീസ് സുരക്ഷ ഒരുക്കിയിട്ടുണ്ട്. അതേസമയം രേഖാമൂലം പരാതി ലഭിക്കാത്തതിനാല്‍ എഫ്‌ഐആര്‍ രജിസ്റ്റര്‍ ചെയ്‌തിട്ടില്ല.
വാസ്‌തവ വിരുദ്ധമായ വിവരങ്ങള്‍ പ്രചരിപ്പിക്കുന്നു എന്നാരോപിച്ച് ദി കേരള സ്റ്റോറി നിരവധി വിമര്‍ശനങ്ങളാണ് നേരിടുന്നത്. രാജ്യത്തിന്‍റെ വിവിധ ഭാഗങ്ങളില്‍ ചിത്രം വന്‍ വിവാദങ്ങള്‍ക്ക് തിരികൊളുത്തിയിരുന്നു. ഇതിനിടെ സമാധാനം നിലനിര്‍ത്തണമെന്ന് ചൂണ്ടിക്കാട്ടി പശ്ചിമ ബംഗാളില്‍ മമത സര്‍ക്കാര്‍ ദി കേരള സ്റ്റോറി നിരോധിച്ചു. വിദ്വേഷവും അക്രമവും ഒഴിവാക്കാനും സംസ്ഥാനത്ത് സമാധാനം നിലനിര്‍ത്താനുമാണ് നിരോധനം എന്ന് ബംഗാള്‍ മുഖ്യമന്ത്രി മമത ബാനര്‍ജി പറഞ്ഞു.