തെലങ്കാനയുടെ വികസനത്തിന് കെസിആറിന്‍റെ പരാജയം അനിവാര്യം: രേവന്ത് റെഡ്ഡി

തെരഞ്ഞെടുപ്പ് അടുക്കുമ്പോള്‍ ഉണ്ടാകുന്ന പ്രഖ്യാപനങ്ങള്‍ മാത്രമാണ് ദലിതര്‍ക്കായി ഇപ്പോള്‍ സര്‍ക്കാര്‍ അനുവദിച്ചിരിക്കുന്ന ധനസഹായമെന്ന് രേവന്ത് റെഡ്ഡി.

ഹൈദരാബാദ്: തെലങ്കാന മുഖ്യമന്ത്രി കെ. ചന്ദ്രശേഖര റാവുവിനെതിരെ ആഞ്ഞടിച്ച് തെലങ്കാന പ്രദേശ് കോണ്‍ഗ്രസിന്‍റെ അധ്യക്ഷൻ എ. രേവന്ത് റെഡ്ഡി. മുഖ്യമന്ത്രിയെ പരാജയപ്പെടുത്തിയാല്‍ മാത്രമെ സംസ്ഥാനത്തിന് പുരോഗതി ഉണ്ടാവുകയുള്ളവെന്ന് രേവന്ത് വിമര്‍ശിച്ചു. അതിന് വീണ്ടും തെരഞ്ഞെടുപ്പ് നടത്തേണ്ടത് അനിവാര്യമാണെന്നും അദ്ദേഹം കൂട്ടിച്ചേര്‍ത്തു.

കെസിആറില്‍ നിന്നുള്ള മോചനത്തിന് തെരഞ്ഞെടുപ്പ് - രേവന്ത് റെഡ്ഡി

"ചന്ദ്രശേഖര്‍ റാവുവിനെ പരാജയപ്പെടുത്തിയാല്‍ മാത്രമെ നമ്മുടെ സംസ്ഥാനത്തിന് വികസനം ഉണ്ടാകുകയുള്ളു. കൊവിഡിനൊപ്പം തെലങ്കാനയിലെ ജനങ്ങള്‍ അനുഭവിക്കുന്ന മറ്റൊരു ദുരിതമാണ് കെസിആര്‍. കൊവിഡിനെ നേരിടാൻ വാക്‌സിൻ ഉണ്ട്. എന്നാല്‍ കെസിആറില്‍ നിന്ന് രക്ഷപ്പെടാൻ തെരഞ്ഞെടുപ്പ് നടത്തണം".

തെരഞ്ഞെടുപ്പ് സമയത്ത് മാത്രമാണ് മുഖ്യമന്ത്രി ജനങ്ങളുമായി സംവദിക്കുന്നത്. ഹുസുരബാദ് ഉപതെരഞ്ഞെടുപ്പ് നടക്കാനിരിക്കയാണ് തെലങ്കാന സര്‍ക്കാറിനെതിരെ രേവന്ത് റെഡ്ഡിയുടെ വിമര്‍ശനം.

തെരഞ്ഞെടുപ്പിന് മുന്നോടിയായുള്ള പ്രഖ്യാപനങ്ങള്‍

കഴിഞ്ഞ ഏഴ് വർഷമായി സംസ്ഥാനത്തെ ദലിതർ വളരെയധികം ദുരിതമനുഭവിക്കുന്നുണ്ട്. എന്നാല്‍ ഇതുവരെ ഒന്നും ചെയ്യാതിരുന്ന സംസ്ഥാന സര്‍ക്കാര്‍ ഇപ്പോള്‍ അവര്‍ക്കായി നിരവധി പ്രഖ്യാപനങ്ങളാണ് നടത്തുന്നതെന്ന ആക്ഷേപമാണ് ഉയരുന്നത്. ദാരിദ്ര്യരേഖയ്ക്ക് താഴെയുള്ള ഓരോ ഗുണഭോക്തൃ ദലിത് കുടുംബത്തിനും 10 ലക്ഷം ധനസഹായമാണ് പ്രഖ്യാപിച്ചിരിക്കുന്നത്. ദലിത് ശാക്തീകരണത്തിനായി പ്രത്യേക പദ്ധതി രൂപീകരിച്ചാണ് പ്രഖ്യാപനം.

തെലങ്കാനയിലെ ജനസംഖ്യയുടെ പകുതിയിലധികം വരുന്ന ദലിതർക്കായി സംസ്ഥാനം ബജറ്റിന്‍റെ 3 ശതമാനം മാത്രമാണ് അനുവദിച്ചതെന്ന് ടിപിസിസി അധ്യക്ഷൻ പറഞ്ഞു. 1,91,000 തൊഴിലവസരങ്ങൾക്കുള്ള വിജ്ഞാപനം പുറത്തിറക്കണമെന്നും റെഡ്ഡി ആവശ്യപ്പെട്ടു.