ന്യൂഡൽഹി:കൊവിഡ് രോഗികളിൽ കുത്തിവയ്‌പിനുപയോഗിക്കുന്ന റെംഡെസിവിർ നൽകാമെന്ന വ്യാജേന ആവശ്യക്കാരിൽ നിന്ന് രണ്ട് ലക്ഷം രൂപയിലധികം പണം തട്ടിയെടുത്ത സംഭവത്തിൽ 18കാരിയായ കോളജ് വിദ്യാർഥിനി അറസ്റ്റിൽ. മധ്യപ്രദേശിലെ സിയോണി പ്രദേശവാസിയായ പ്രതി ഡൽഹിയിലെ ഒരു സർവകലാശാലയിൽ സൈക്കോളജി വിദ്യർഥിനിയാണ്. റെംഡെസിവിർ നൽകാമെന്ന് പറഞ്ഞ് ഡൽഹിയിലെ 11 പേരിൽ നിന്നും 2,25,000 രൂപയാണ് തട്ടിയെടുത്തതെന്നും ഡൽഹി പൊലീസ് അറിയിച്ചു. തിങ്കളാഴ്‌ച സിയോണിയിലെ വീട്ടിൽ നിന്നാണ് യുവതിയെ അറസ്റ്റ് ചെയ്തത്.
സംഭവത്തിൽ ഡൽഹി ഡിഫൻസ് കോളനി പൊലീസ് സ്റ്റേഷനിൽ അങ്കിത് കുമാറെന്നയാൾ നൽകിയ പരാതിയിൽ കേസ് രജിസ്റ്റർ ചെയ്തു. അഞ്ച് കുത്തിവയ്‌പുകൾ 32,400 രൂപയ്ക്ക് നൽകുമെന്ന് കുമാറിന് നൽകിയ വാഗ്‌ദാനത്തെ തുടർന്ന് തുക പ്രതിയുടെ അക്കൗണ്ടിലേക്ക് നൽകുകയായിരുന്നു. എന്നാൽ മരുന്ന് ലഭ്യമാകാത്തതിനെ തുടർന്നാണ് കബളിപ്പിക്കപ്പെട്ടുവെന്ന വിവരം അറിയുന്നത്. ഇയാൾ നൽകിയ പരാതിയെ തുടർന്ന് പ്രതിയുടെ ബാങ്ക് അക്കൗണ്ട് വിവരങ്ങൾ ഉപയോഗിച്ച് യുവതിയെ പിടികൂടുകയായിരുന്നു.