ചണ്ഡീഗഡ്:കൊവിഡ് അതിരൂക്ഷമായ സാഹചര്യത്തില്‍ പഞ്ചാബില്‍ ഓക്‌സിജന്‍ ലഭിക്കാതെ ആറ് രോഗികള്‍ മരിച്ചു. മരിച്ചവരില്‍ അഞ്ച് കൊവിഡ് രോഗികള്‍ ഉള്‍പ്പെടുന്നു. അമൃത്‌സറിലെ സ്വകാര്യ ആശുപത്രിയിലാണ് ശനിയാഴ്‌ച ഓക്‌സിജന്‍ വിതരണം തടസപ്പെട്ടത് മൂലം രോഗികള്‍ പ്രാണവായു കിട്ടാതെ മരിച്ചത്. നീല്‍കാന്ത് ആശുപത്രിയിലാണ് സംഭവം നടന്നത്. വെന്‍റിലേറ്ററുകളിലേക്ക് ഓക്‌സിജന്‍ എത്തിയിരുന്നില്ലെന്ന് മരിച്ചവരുടെ കുടുംബാഗങ്ങള്‍ ആരോപിച്ചു.
സര്‍ക്കാറില്‍ നിന്നുള്ള ഓക്‌സിജന്‍ വിതരണം കുറവാണെന്ന് വെള്ളിയാഴ്‌ച രാത്രി തങ്ങളെ അറിയിച്ചിരുന്നതായി മരിച്ച ഇരുപത്തെട്ടുകാരന്‍ ഗുരുദേവ് സിങ്ങിന്‍റെ കുടുംബം പറയുന്നു. ശ്വാസം തടസം മൂലമാണ് ഗുരുദേവിനെ ആശുപത്രിയില്‍ പ്രവേശിപ്പിച്ചത്. എന്നാല്‍ ഓക്‌സിജന്‍ ലഭിക്കാതെ സ്ഥിതി വഷളായ ഗുരുദേവ് ഇന്നലെ രാത്രിയോടെ മരിക്കുകയായിരുന്നുവെന്നും കുടുംബാഗങ്ങള്‍ കൂട്ടിച്ചേര്‍ത്തു.