കുട്ടികളാകട്ടെ മുതിർന്നവരാകട്ടെ പ്രായഭേദമന്യേ ഏവരും ഒരു പോലെ ആരാധിക്കുന്ന താരമാണ് ബോളിവുഡിന്‍റെ കിങ് ഖാൻ ഷാരൂഖ് ഖാൻ. താരത്തിന്‍റെ സാന്നിധ്യമുള്ളിടത്തെല്ലാം ആയിരക്കണക്കിന് ആരാധകർ തടിച്ച് കൂടുന്ന കാഴ്‌ച നാം കണ്ടിട്ടുള്ളതുമാണ്. ആരാധകരോടും ഇതേ ആത്മബന്ധമാണ് ഷാരൂഖ് പുലർത്തുന്നത്. ഇപ്പോൾ ശ്രീനഗർ എയർപോർട്ടിൽ നിന്നുള്ള താരത്തിന്‍റെ വീഡിയോയാണ് സോഷ്യൽ മീഡിയയിൽ ഇടം പിടിച്ചിരിക്കുന്നത്.
തന്‍റെ ഏറ്റവും പുതിയ ചിത്രമായ ഡുങ്കിയുടെ ചിത്രീകരണത്തിന് ശേഷം മുംബൈയിലേക്ക് മടങ്ങുന്നതിനായി ശ്രീനഗർ എയർപോർട്ടിൽ എത്തിയതായിരുന്നു ഷാരൂഖ്. ഇതിനിടെയാണ് എയർപോർട്ടിലെ യാത്രക്കാർ താരത്തെ വളഞ്ഞത്. താരത്തിനെ പോകാൻ അനുവദിക്കാതെ ചുറ്റും കൂടിയ ആരാധകർ സെൽഫി എടുക്കാൻ ഉൾപ്പെടെ ശ്രമിക്കുന്നതാണ് വീഡിയോയിൽ ദൃശ്യമാകുന്നത്.
എന്നാൽ ആരാധകരുടെ അതിരുവിട്ട പെരുമാറ്റത്തിലും ശാന്തനായി മുന്നോട്ട് പോകുന്ന ഷാരൂഖിനെയാണ് വീഡിയോയിൽ കാണാനാകുന്നത്. വിമാനത്താവളത്തിൽ നിന്ന് പുറത്ത് വന്ന മറ്റൊരു വീഡിയോയിൽ ഷാരൂഖ് ഖാൻ എയർപോർട്ട് സെക്യുരിറ്റിയുമായി സംവദിക്കുന്നതും പുഞ്ചിരിയോടെ അവരെ അഭിവാദ്യം ചെയ്യുന്നതും കാണാമായിരുന്നു. അതേസമയം ആരാധകരുടെ പ്രവർത്തിക്കെതിരെ രൂക്ഷ വിമർശനങ്ങളാണ് സമൂഹ മാധ്യമങ്ങളിൽ ഉയരുന്നത്.
ഷൂട്ടിങ് തിരക്കുകളാൽ ഷാരൂഖ് ക്ഷീണിതനാണെന്നും ഈ അവസ്ഥയിൽ താരത്തെ ഇങ്ങനെ ബുദ്ധിമുട്ടിക്കാൻ പാടില്ല എന്ന അഭിപ്രായങ്ങളാണ് ആരാധകർ സോഷ്യൽ മീഡിയയിൽ ഉയർത്തുന്നത്. താരത്തിന്‍റെ സ്വകാര്യത മാനിക്കണമെന്നും അദ്ദേഹത്തെ വെറുതെ വിടണമെന്നുമുള്ള കമന്‍റുകളും നിറയുന്നുണ്ട്. ജീൻസും വെള്ള ടീ ഷർട്ടും കറുത്ത ലെതർ ജാക്കറ്റും ധരിച്ചാണ് ഷാരൂഖ് എയർപോർട്ടിൽ എത്തിയത്.