ന്യൂഡല്‍ഹി: വരാനിരിക്കുന്ന തെരഞ്ഞെടുപ്പിലെ പരാജയം മനസിലാക്കിയതുകൊണ്ടാണ് പ്രധാനമന്ത്രി (PM Narendra Modi) കാര്‍ഷിക നിയമങ്ങള്‍ (Farm Laws) പിന്‍വലിച്ചതെന്ന് കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി (Priyanka Gandhi). നിങ്ങളുടെ ഉദ്ദേശ്യങ്ങളും മാറിക്കൊണ്ടിരിക്കുന്ന നിങ്ങളുടെ മനോഭാവവും വിശ്വസിക്കാൻ പ്രയാസമാണെന്നും പ്രധാനമന്ത്രിയെ പരിഹസിച്ചുകൊണ്ട് പ്രിയങ്ക ഗാന്ധി ട്വിറ്ററില്‍ കുറിച്ചു.
'നിങ്ങളുടെ പാര്‍ട്ടി നേതാക്കള്‍ കര്‍ഷകരെ അപമാനിച്ചു, അവരെ ഭീകരരെന്നും ചതിയന്മാരെന്നും ഗുണ്ടകളെന്നും നിയമലംഘകരെന്നും വിളിച്ചു. നിങ്ങള്‍ തന്നെ അവരെ 'ആന്ദോളന്‍ജീവി' എന്ന് വിളിച്ചു. അവരെ തല്ലിച്ചതച്ചു, അറസ്റ്റ് ചെയ്‌തു, ' പ്രിയങ്ക ഗാന്ധി വിമര്‍ശിച്ചു.
600 കർഷകർ രക്തസാക്ഷികളായപ്പോഴും 350 ലധികം ദിവസം സമരം നീണ്ടപ്പോഴും കേന്ദ്രമന്ത്രിയുടെ മകൻ കർഷകരെ കാറിടിച്ച് കൊന്നപ്പോഴും കാര്യമാക്കിയില്ലെന്നും മോദിയെ രൂക്ഷമായി വിമര്‍ശിച്ചുകൊണ്ട് പ്രിയങ്ക പറഞ്ഞു.