ന്യൂഡൽഹി: ജനാധിപത്യത്തിന്‍റെ മരണത്തിനാണ് ഇന്ത്യ സാക്ഷ്യം വഹിക്കുന്നതെന്ന് കോൺഗ്രസ് നേതാവ് രാഹുൽ ഗാന്ധി. സ്വേച്ഛാധിപത്യത്തിനെതിരെ നിലകൊള്ളുന്ന യാതൊരാളും രാജ്യത്ത് നികൃഷ്‌ടമായി ആക്രമിക്കപ്പെടുകയാണെന്നും രാഹുൽ ഗാന്ധി ആരോപിച്ചു. വിലക്കയറ്റം, തൊഴിലില്ലായ്‌മ, സമൂഹത്തിലെ അക്രമം തുടങ്ങിയ ജനങ്ങളുടെ പ്രശ്‌നങ്ങൾ ഉന്നയിക്കരുത് എന്നതാണ് സർക്കാരിന്‍റെ ഏക അജണ്ടയെന്നും രാഹുൽ ഗാന്ധി വാർത്ത സമ്മേളനത്തിൽ പറഞ്ഞു.
ഇന്ത്യയിൽ ജനാധിപത്യമല്ല, നാല് പേരുടെ ഏകാധിപത്യമാണ് നിലനിൽക്കുന്നത്. നൂറ്റാണ്ട് മുൻപ് ഓരോ ഇഷ്‌ടിക കൊണ്ട് നിർമിച്ചുവന്ന രാജ്യം നമ്മുടെ കൺമുന്നിൽ തന്നെ നശിപ്പിക്കപ്പെടുകയാണെന്നും രാഹുൽ ഗാന്ധി പറഞ്ഞു. സ്വേച്ഛാധിപത്യത്തിനെതിരായി നിലകൊള്ളുന്നവരെ ക്രൂരമായി ആക്രമിക്കുകയും ജയിലിലടക്കുകയുമാണ്. അവർ ആരാണെന്നോ എവിടെ നിന്ന് വരുന്നതാണെന്നോ ഏത് മതക്കാരനാണെന്നോ ആണോ പെണ്ണോ എന്നതൊന്നും ഇവർക്ക് പ്രശ്‌നമല്ലെന്നും അദ്ദേഹം പറഞ്ഞു.