റഫാൽ ഇടപാട്‌; ഗുരുതര വെളിപ്പെടുത്തലുമായി ഫ്രഞ്ച് അന്വേഷണ ജേർണല്‍

റഫാൽ ഇടപാടില്‍ നടന്നത്‌ ഗുരുതര അഴിമതിയെന്ന് ഫ്രഞ്ച് അന്വേഷണ ജേർണലായ മീഡിയപാർട്ട്. ദസാൾട്ട് ഏവിയേഷന് ഇന്ത്യയുമായുള്ള ഇടപാട് ഉറപ്പിക്കുന്നതിനായി ഇടനിലക്കാരന് രഹസ്യ കമ്മീഷനായി നല്‍കിയത്‌ 7.5 മില്യൺ യൂറോ (650 ദശലക്ഷത്തിൽ താഴെ).

റഫാൽ ഇടപാടില്‍ ഗുരുതര വെളിപ്പെടുത്തലുമായി ഫ്രഞ്ച് അന്വേഷണ ജേർണലായ മീഡിയപാർട്ട്. ഫ്രഞ്ച് വിമാന നിർമ്മാതാക്കളായ ദസാൾട്ട് ഏവിയേഷന് ഇന്ത്യയുമായുള്ള റഫാൽ ഇടപാട് ഉറപ്പിക്കുന്നതിനായി ഒരു ഇടനിലക്കാരന് 7.5 മില്യൺ യൂറോ രഹസ്യ കമ്മീഷനായി നൽകുന്നതിനായി വ്യാജ ഇൻവോയ്‌സുകൾ ഉപയോഗിച്ചുവെന്നാണ്‌ മീഡിയപാർട്ടിന്‍റെ പുതിയ റിപ്പോർട്ട്.

36 റഫാൽ യുദ്ധവിമാനങ്ങൾ വിതരണം ചെയ്യുന്നതിനായി ഇന്ത്യയുമായുള്ള 59,000 കോടി രൂപയുടെ അന്തർ-സർക്കാർ ഇടപാടിലെ അഴിമതിയും പ്രീണനവും സംബന്ധിച്ച് ജുഡീഷ്യൽ അന്വേഷണത്തിന് നേതൃത്വം നൽകാൻ ഫ്രഞ്ച് ജഡ്‌ജിയെ നിയമിച്ചതായി ജൂലൈയിൽ മീഡിയപാർട്ട് റിപ്പോർട്ട് ചെയ്‌തിരുന്നു.

ഏറ്റവും പുതിയ റിപ്പോർട്ടിനെക്കുറിച്ച് പ്രതിരോധ മന്ത്രാലയമോ ദസാൾട്ട് ഏവിയേഷനോ പ്രതികരിച്ചിട്ടില്ല. രേഖകൾ നിലവിലുണ്ടെങ്കിലും ഇന്ത്യൻ അന്വേഷണ ഏജൻസികൾ വിഷയം തുടരേണ്ടതില്ലെന്ന് തീരുമാനിച്ചതായും ജേര്‍ണല്‍ ആരോപിച്ചു. ഇതിൽ ഓഫ്‌ഷോർ കമ്പനികൾ, സംശയാസ്‌പദമായ കരാറുകൾ, തെറ്റായ ഇൻവോയ്‌സുകൾ എന്നിവ ഉൾപ്പെടുന്നു.

2018 ഒക്ടോബർ മുതൽ ഫ്രഞ്ച് ഏവിയേഷൻ സ്ഥാപനമായ ദസാൾട്ട് ഇടനിലക്കാരനായ സുഷേൻ ഗുപ്‌തയ്ക്ക് രഹസ്യ കമ്മീഷനുകളായി കുറഞ്ഞത് 7.5 മില്യൺ യൂറോ (650 ദശലക്ഷത്തിൽ താഴെ) നൽകിയതായി തെളിവുണ്ടെന്നും മീഡിയപാർട്ട് റിപ്പോർട്ടിൽ അവകാശപ്പെട്ടു.

റഫാൽ നിർമാതാക്കളായ ദസാൾട്ട് ഏവിയേഷനും ഇന്ത്യയുടെ പ്രതിരോധ മന്ത്രാലയവും കരാറിൽ അഴിമതിയുണ്ടെന്ന ആരോപണം നേരത്തെ തള്ളിയിരുന്നു. സുപ്രീം കോടതിയും 2019-ൽ ഇടപാടിൽ അന്വേഷണം ആവശ്യപ്പെട്ടുള്ള ഹർജികൾ തള്ളിക്കളഞ്ഞിരുന്നു. അന്വേഷണത്തെക്കുറിച്ചുള്ള മീഡിയപാർട്ടിന്‍റെ റിപ്പോർട്ടിനോട് പ്രതികരിച്ചുകൊണ്ട് ഏപ്രിലിൽ പ്രസിദ്ധീകരിച്ച ഒരു പ്രസ്‌താവനയിൽ, ഒഇസിഡി കൈക്കൂലി വിരുദ്ധ, ദേശീയ നിയമങ്ങള്‍ കർശനമായി പാലിച്ചാണ് ഗ്രൂപ്പ് പ്രവർത്തിക്കുന്നത് എന്ന് ദസാൾട്ട് ഏവിയേഷന്‍ പ്രതികരിച്ചിരുന്നു.

2019 ലെ ലോക്‌സഭ തെരഞ്ഞെടുപ്പിന് മുന്‍പ്‌ ഇടപാടിനെ കുറിച്ചും അഴിമതിയെ കുറിച്ചും കോൺഗ്രസ് നിരവധി ചോദ്യങ്ങൾ ഉന്നയിച്ചെങ്കിലും സർക്കാർ എല്ലാ ആരോപണങ്ങളും നിരസിച്ചിരുന്നു.