പഞ്ചാബ് തെരഞ്ഞെടുപ്പ്; കച്ച കെട്ടി രാഷ്‌ട്രീയ പാർട്ടികൾ, എല്ലാ കണ്ണുകളും മാൾവയിലേക്ക്

69 അസംബ്ലി സീറ്റുകളുള്ള മാൾവയാണ് പഞ്ചാബ് നിയമസഭയുടെ ഭാവി നിർണയിക്കുന്നത്

ചണ്ഡീഗഡ്:പഞ്ചാബിലെ രാഷ്ട്രീയ പാർട്ടികളെല്ലാം 2022ലെ തെരഞ്ഞെടുപ്പിനുള്ള തയ്യാറെടുപ്പുകൾ ശക്തമാക്കിക്കഴിഞ്ഞു. ഇതിൽ എല്ലാ രാഷ്ട്രീയ പാർട്ടികളുടെയും കണ്ണ് പഞ്ചാബിലെ മാൾവ മേഖലയിലാണ്. കാരണം ഇവിടെ നിന്ന് കൂടുതൽ സീറ്റുകൾ ഏത് പാർട്ടി നേടുന്നോ അവരാകും സർക്കാർ രൂപീകരിക്കുന്നത്. പഞ്ചാബ് നിയമസഭയുടെ ഭാവി നിർണയിക്കുന്നത് തന്നെ മാൾവയാണെന്ന് പറയാം.

പഞ്ചാബിലെ ആകെയുള്ള 117 നിയമസഭ മണ്ഡലങ്ങളിൽ മാൾവയ്ക്ക് മാത്രം 69 അസംബ്ലി സീറ്റുകളാണുള്ളത്. മജായിൽ 25ഉം ദോബയിൽ 23 അസംബ്ലി സീറ്റുകളുമുണ്ട്. പഞ്ചാബിൽ സർക്കാർ രൂപീകരിക്കാൻ ഒരു രാഷ്‌ട്രീയ പാർട്ടിക്ക് വേണ്ടത് 59 സീറ്റുകളാണ്. അതിനാൽ തന്നെ എത് രാഷ്‌ട്രീയ പാർട്ടിക്ക് മാൾവയിൽ ഭൂരിപക്ഷം കിട്ടുന്നുവോ അവരാകും പഞ്ചാബിൽ സർക്കാർ രൂപീകരിക്കുക.

2012ൽ എസ്എഡി-ബിജെപി സർക്കാർ

2012ലെ പഞ്ചാബ് നിയമസഭ തെരഞ്ഞെടുപ്പിൽ മാൾവയിൽ അകാലിദൾ 34 സീറ്റും, കോൺഗ്രസിന് 31 സീറ്റും, ബിജെപി രണ്ട് സീറ്റും നേടിയിരുന്നു. മജയിൽ അകാലിദളിന് 11ഉം, കോൺഗ്രസിന് 9ഉം, ബിജെപിക്ക് 5ഉം സീറ്റുകൾ ലഭിച്ചു. അതുപോലെ ദോവാബയിൽ അകാലിദൾ 11 സീറ്റും, കോൺഗ്രസ് 6 സീറ്റും, ബിജെപി 5 സീറ്റും നേടി. സർക്കാർ രൂപീകരിക്കാൻ മാൾവയിലെ 34 സീറ്റുകൾ അകാലിദളിന് ഗണ്യമായ സംഭാവനയാണ് നൽകിയത്.

2017ൽ കോൺഗ്രസ് സർക്കാർ

2017ലെ നിയമസഭ തെരഞ്ഞെടുപ്പിൽ മാൾവയിൽ കോൺഗ്രസ് 40 സീറ്റും, ശിരോമണി അകാലിദൾ എട്ട് സീറ്റും, ബിജെപി ഒരു സീറ്റും, ആം ആദ്‌മി പാർട്ടി 18 സീറ്റും നേടി. മജയിൽ കോൺഗ്രസിന് 2 സീറ്റും ബിജെപിക്ക് 1 സീറ്റും ശിരോമണി അകാലിദളിന് 2 സീറ്റും ലഭിച്ചു. ദോബയിൽ കോൺഗ്രസ് 15 സീറ്റും, ആം ആദ്‌മി പാർട്ടി 2 സീറ്റും, ബിജെപി 1 സീറ്റും, ശിരോമണി അകാലിദൾ 5 സീറ്റും നേടി. 2017ൽ കോൺഗ്രസ് കേവല ഭൂരിപക്ഷ സർക്കാർ രൂപീകരിച്ചു.

വികസനമെത്താത്ത മാൾവ

ദോബയിലും മജയിലും ഉണ്ടായ വികസനം മാൾവയിൽ ഉണ്ടായിട്ടില്ല. സാക്ഷരതാ നിരക്കും ലിംഗാനുപാതവും ഏതൊരു പ്രദേശത്തിന്‍റെയും വികസനത്തിലെ പ്രധാന ഘടകങ്ങളായി കണക്കാക്കപ്പെടുന്നു. ഇത് രണ്ടിലും മാൾവ വളരെ പിന്നിലാണ്. ദോബയിൽ 81.48% ഉം, മജയിൽ 75.9% ഉം സാക്ഷരതാ നിരക്ക് ഉള്ളപ്പോൾ മാൾവയിൽ 72.3% മാത്രമാണ് സാക്ഷരത രേഖപ്പെടുത്തിയിട്ടുള്ളത്.

സ്ത്രീ-പുരുഷ അനുപാതത്തിലും ഈ രണ്ട് മേഖലകളെക്കാൾ പിന്നിലാണ് മാൾവ. കർഷക ആത്മഹത്യകൾ, വർധിച്ചുവരുന്ന കാൻസർ രോഗം, കുടിവെള്ളത്തിന്‍റെ അഭാവം, മണൽ വിലക്കയറ്റം, പരുത്തിക്കൃഷിയിലെ ചുവന്ന വെട്ടുക്കിളി ശല്യം, തൊഴിലില്ലായ്‌മ, ക്രമസമാധാന തകർച്ച എന്നിവയാണ് ഇവിടുത്തെ മറ്റ് പ്രധാന പ്രശ്‌നങ്ങൾ.

ജാതി രാഷ്‌ട്രീയം പ്രധാന ആയുധം

പഞ്ചാബ് നിയമസഭ തെരഞ്ഞെടുപ്പിൽ പരമാവധി മുഖ്യമന്ത്രിമാരെ നൽകിയിട്ടും മാൾവ വികസിച്ചിട്ടില്ല. ഇതിന് പിന്നിൽ ഒരു വലിയ കാരണമുണ്ടെന്ന് പറയുകയാണ് മുൻ വിവരാവകാശ കമ്മീഷണർ ചന്ദ്രപ്രകാശ്. 'ശിരോമണി അകാലിദൾ എപ്പോഴും പന്തിക് വിഭാഗത്തെ വെച്ച് കളിക്കുമ്പോൾ, കോൺഗ്രസ് ദലിതരുടെ പേരിൽ രാഷ്ട്രീയം തുടർന്നു.' ചന്ദ്രപ്രകാശ് പറയുന്നു.

പഞ്ചാബിലെ മാൾവ കാർഷിക മേഖലയുമായി ബന്ധപ്പെട്ടിരിക്കുന്നു. എന്നാൽ ഒരു രാഷ്ട്രീയ പാർട്ടിയും കാർഷിക പുരോഗതിയിൽ ശ്രദ്ധിച്ചില്ല. പുരോഗതിക്കായി ഒരു ശ്രമവും നടത്തിയിട്ടില്ല. 1998-ൽ പ്രകാശ് സിങ് ബാദൽ ബതിന്ദാ ജില്ലയിലെ ഫുലോകരിയിൽ റിഫൈനറി പദ്ധതി ഉദ്ഘാടനം ചെയ്തിരുന്നു. എന്നാൽ ഈ വികസന പദ്ധതികൾ പോലും മാൾവയുടെ വികസനത്തിൽ കാര്യമായ സംഭാവന നൽകാൻ കഴിഞ്ഞില്ല.

കൂടാതെ മയക്കുമരുന്നിന്‍റെ ആധിപത്യം കാരണം കൂടുതൽ യുവാക്കൾ വിദേശത്ത് സ്ഥിരതാമസമാക്കി. രാഷ്ട്രീയ പാർട്ടികളുടെ വ്യക്തിപരമായ താൽപ്പര്യങ്ങൾ നിറവേറ്റിയതിനാൽ മാൾവയ്ക്ക് കൂടുതൽ വികസിക്കാനും കഴിഞ്ഞില്ല.

പരമ്പരാഗത പാർട്ടികളെ തകിടം മറിക്കാൻ മനസുറപ്പിച്ചവർ

2022ൽ നടക്കാനിരിക്കുന്ന നിയമസഭാ തെരഞ്ഞെടുപ്പിൽ കാർഷികമേഖലയ്‌ക്കൊപ്പം വ്യാവസായികമായും കരുത്തുറ്റ പിന്നോക്കാവസ്ഥയിലുള്ള മാൾവയിലെ ജനങ്ങളുടെ മനോഭാവം എന്തായിരിക്കും? തങ്ങളുടെ പ്രശ്‌നങ്ങൾ പരിഹരിക്കാത്തതിൽ ഇവിടുത്തെ ജനങ്ങൾക്ക് കടുത്ത അമർഷമുണ്ടെന്ന് ചില രാഷ്ട്രീയ വിദഗ്‌ദർ പറയുന്നു.

പല ഗ്രാമങ്ങളിലും ജനങ്ങൾ രോഷാകുലരാണ്. അവർ ഗ്രാമങ്ങളിലെ രാഷ്ട്രീയ പാർട്ടികളെ പോലും ബഹിഷ്‌കരിച്ചിട്ടുണ്ട്. രാഷ്ട്രീയ പാർട്ടികളും ഗ്രാമങ്ങളിൽ പ്രവേശന നിരോധന ബോർഡുകൾ സ്ഥാപിച്ചിട്ടുണ്ട്. അതുകൊണ്ട് തന്നെ തെരഞ്ഞെടുപ്പിൽ പരമ്പരാഗത പാർട്ടികളെ തറപറ്റിക്കാൻ ജനം മനസ് ഉറപ്പിച്ചു കഴിഞ്ഞിരിക്കുന്നു എന്ന് തന്നെ പറയാം.

രാഷ്ട്രീയ പാർട്ടികളും കർഷക സംഘടനകളും തമ്മിൽ ഭിന്നത

മാൾവയിലെ വോട്ട് ബാങ്കിനെ സ്വാധീനിക്കുന്ന ഏറ്റവും വലിയ കേഡർ കർഷക സംഘടനകളാണ്. ഈ കർഷക സംഘടനകൾക്ക് ഗ്രാമ തലത്തിൽ വളരെയധികം സ്വാധീനമുണ്ട്. ധാരാളം ജനങ്ങൾ അവരോടൊപ്പമുണ്ട്. ഭാരതി കിസാൻ യൂണിയൻ ഏക്താ, ഉഗ്രഹൻ, ഭാരതി കിസാൻ യൂണിയൻ എന്നീ സംഘടനകൾക്ക് സിദ്ധുപൂർ ഗ്രാമങ്ങളിൽ സ്വന്തമായി ഒരു വലിയ കേഡർ തന്നെയുണ്ട്.

കിസാൻ ആന്ദോളന് പിന്നാലെ രണ്ട് കിസാൻ ജാഥാബന്ദികളും തെരഞ്ഞെടുപ്പിൽ പങ്കെടുക്കില്ലെന്ന് പ്രഖ്യാപിച്ചിരുന്നു. ഇതിന് ശേഷം ഗ്രാമങ്ങളിൽ ഇവർ കൂടുതൽ ശക്‌തി പ്രാപിച്ചിട്ടുണ്ട്. ഇത് പഞ്ചാബ് നിയമസഭാ തെരഞ്ഞെടുപ്പിൽ രാഷ്ട്രീയ പാർട്ടികൾക്കുള്ള ഒരു പ്രധാന മുന്നറിയിപ്പാണ്.

ദേര സച്ചാ സൗദക്കും വോട്ട് ബാങ്കിൽ സ്വാധീനം

അതുപോലെ മാൾവയിൽ ദേര സച്ചാ സൗദ സിർസയ്ക്കും വളരെയധികം സ്വാധീനമുണ്ട്. എല്ലാ തെരഞ്ഞെടുപ്പുകളിലും ഒരൊറ്റ രാഷ്ട്രീയ പാർട്ടിയെ പിന്തുണയ്ക്കാൻ ദേരയുടെ രാഷ്ട്രീയ വിഭാഗം അനുയായികളോട് ആവശ്യപ്പെടാറുണ്ട്.

ദേരയുടെ വോട്ട് ബാങ്ക് ആകർഷിക്കുന്നതിനായി രാഷ്ട്രീയക്കാരും ഇവരുടെ പ്രവർത്തനങ്ങളിൽ കൂടുതലായി ഇടപെടുന്നുണ്ട്. രാഷ്ട്രീയ നേതാക്കൾക്ക് മുന്നിൽ ഐക്യം തെളിയിക്കാൻ ദേരാ സച്ചാ സൗദയും അടുത്തിടെ പഞ്ചാബിലെ സിർസയിലെ സലാബത്പുരയിൽ ഒത്തുകൂടിയിരുന്നു.

പഞ്ചാബിലെ 15 ജില്ലകളും മാൾവയിൽ

പഞ്ചാബിലെ 23 ജില്ലകളിൽ 15 ജില്ലകളും മാൾവയിലാണ്. ഫിറോസ്‌പൂർ, മുക്ത്സർ, ഫരീദ്കോട്ട്, മോഗ, ലുധിയാന, മലേർകോട്‌ല, ബതിന്ഡ, മാൻസ, സംഗ്രൂർ, പട്യാല, ഫത്തേഗഡ് സാഹിബ്, എസ്എഎസ് നഗർ, റോപ്പർ, ബർണാല, ഫാസിൽക്ക എന്നീ ജില്ലകളാണ് മാൾവയിൽ ഉൾപ്പെടുന്നത്.

ഭൂമിശാസ്ത്രപരമായി ഏറ്റവും വലിയ പ്രദേശമെന്ന നിലയിൽ പരുത്തി കൃഷി ചെയ്യുന്ന കർഷകരാണ് ഇവിടെ ഏറ്റവും കൂടുതലുള്ളത്. അതിനാൽ തന്നെ ദോബയെയും മജയെയും അപേക്ഷിച്ച് കൂടുതൽ ജില്ലകളുള്ള മാൾവ പഞ്ചാബ് തെരഞ്ഞെടുപ്പിനെ വളരെയധികം സ്വാദീനിക്കും.

പുതിയ ജില്ലയായി മലേർകോട്‌ല

മുൻ മുഖ്യമന്ത്രി ക്യാപ്റ്റൻ അമരീന്ദർ സിങ് മാൾവയിലെ മലേർകോട്‌ലയ്ക്ക് ജില്ലാ പദവി നൽകിയിരുന്നു. എന്നാൽ സർക്കാർ പദ്ധതികൾ കൃത്യമായി നടപ്പാക്കാത്തതിനാൽ മലേർകോട്‌ലയിൽ താഴെത്തട്ടിലേക്ക് കാര്യമായ പ്രവർത്തനങ്ങൾ നടത്താനായില്ല.

ഇത് മയക്കുമരുന്ന് കടത്തും തൊഴിലില്ലായ്‌മയും വർധിപ്പിച്ചു. കൂടാതെ റോഡ് പോലുള്ള അടിസ്ഥാന സൗകര്യങ്ങളുടെ അവസ്ഥയും വളരെ പരിതാപകരമായി. മാലിന്യപ്രശ്‌നം പരിഹരിക്കുന്നതിലും കഴിഞ്ഞ 30 വർഷമായി അധികാരത്തിലിരിക്കുന്ന പരമ്പരാഗത പാർട്ടികൾ പരാജയപ്പെട്ടു.

ദലിതരുടെയും കർഷകരുടെയും മാൾവ

കർഷകരുടെയും ദലിതരുടെയും മിശ്രിതമാണ് മാൾവ. ഇവിടെ മതമാണ് പ്രധാന ആയുധം. ഇത്തവണ കോൺഗ്രസ്, അകാലിദൾ-ബിഎസ്‌പി, ബിജെപി-പിഎൽസി-ശിരോമണി അകാലിദൾ (യുണൈറ്റഡ്), എഎപി, സംയുക്ത സമാജ് മോർച്ച (എസ്എസ്എം) സഖ്യങ്ങൾ തമ്മിലാണ് ഇവിടെ കടുത്ത മത്സരം കാഴ്‌ചവെയ്‌ക്കുന്നത്. ഫെബ്രുവരി 20നാണ് പഞ്ചാബിലെ തെരഞ്ഞെടുപ്പ്.