കൊല്‍ക്കത്ത : ബെഡ്‌ഷീറ്റില്‍ ആര്‍ത്തവ രക്തം പുരണ്ടെന്ന് ആരോപിച്ച് പ്രൊഫസര്‍ക്ക് അധിക ചാര്‍ജ്‌ ചുമത്തി ഹോട്ടല്‍ അധികൃതരുടെ വിദ്വേഷ നടപടി. വെസ്റ്റ് മിഡ്‌നാപൂരിലെ ഒരു ഹോട്ടലിലായിരുന്നു വിചിത്ര സംഭവം. ആര്‍ത്തവ രക്തം കഴുകിയാല്‍ പോകില്ലെന്നും ആ ബെഡ്ഷീറ്റ് ഇനി ഉപയോഗിക്കാനാകില്ലെന്നും വാദിച്ചായിരുന്നു ഹോട്ടലിന്‍റെ നടപടി.
'ബെഡ്‌ഷീറ്റില്‍ ആര്‍ത്തവ രക്തം, കഴുകിയാല്‍ പോകില്ല' ; അധ്യാപികയില്‍ നിന്ന് 400 രൂപ അധികം ഈടാക്കി ഹോട്ടലധികൃതരുടെ അയിത്ത നടപടി
ബന്ധുവിനെ കാണാന്‍ അമ്മാവനൊപ്പം ഞായറാഴ്‌ച രാത്രിയാണ് കോളജ്‌ പ്രൊഫസറായ മാളവിക വെസ്റ്റ് മിഡ്‌നാപൂരിലെ ഒരു ഹോട്ടലില്‍ മുറിയെടുത്തത്. അടുത്ത ദിവസം മുറി ഒഴിഞ്ഞ്‌ ബില്ലടയ്ക്കുമ്പോഴാണ് ബെഡ്ഷീറ്റ് ഇനത്തില്‍ 400 രൂപ അധികം രേഖപ്പെടുത്തിയത്‌ ശ്രദ്ധയില്‍പ്പെട്ടത്. ഇതേക്കുറിച്ച് അന്വേഷിച്ചപ്പോള്‍ ബെഡ്‌ഷീറ്റില്‍ ആര്‍ത്തവ രക്തക്കറ കണ്ടതിനാലാണിതെന്ന വിചിത്ര വാദമാണ് ജീവനക്കാര്‍ മുന്നോട്ടുവച്ചത്.