മൻമോഹൻ സിങിന് ജന്മദിനാശംസകൾ നേര്‍ന്ന് പ്രധാനമന്ത്രി

മൻമോഹൻ സിങിന് ട്വിറ്ററിലൂടെയാണ് പ്രധാനമന്ത്രി ആശംസകള്‍ നേര്‍ന്നത്.

ന്യൂഡല്‍ഹി: രാജ്യത്തിന്‍റെ മുന്‍ പ്രധാനമന്ത്രി മൻമോഹൻ സിങിന് ജന്മദിനാശംസകൾ നേര്‍ന്ന് നരേന്ദ്ര മോദി. ട്വീറ്റിലൂടെയാണ് തന്‍റെ മുൻഗാമിയ്‌ക്ക് പ്രധാനമന്ത്രി ആശംസകള്‍ അറിയിച്ചത്.

"നമ്മുടെ മുൻ പ്രധാനമന്ത്രി ഡോ. മൻമോഹൻ സിങ് ജിയ്ക്ക് ജന്മദിനാശംസകൾ. അദ്ദേഹത്തിന്‍റെ ദീർഘായുസിനും അത്ഭുതകരമായ ആരോഗ്യത്തിനും വേണ്ടി ഞാൻ പ്രാർഥിക്കുന്നു". മോദി ട്വീറ്റ് ചെയ്തു.

2004 - 2014 കാലയളവില്‍ യു.പി.എ സഖ്യ സർക്കാരിന് നേതൃത്വം നൽകിയ സിങിന് ഞായറാഴ്ച 89 വയസ് പൂര്‍ത്തിയായി. 1991 - 1996 കാലഘട്ടത്തിൽ പി.വി നരസിംഹറാവു സർക്കാരിൽ ധനമന്ത്രിയായിരുന്ന മന്‍മോഹന്‍, രാജ്യത്ത് സാമ്പത്തിക പരിഷ്‌കാരങ്ങൾ കൊണ്ടുവരുന്നതിൽ പ്രധാനപങ്കുവഹിച്ചത് ശ്രദ്ധനേടിയിരുന്നു.