ശ്രീനഗര്‍: ജമ്മു വിമാനത്താവളത്തിലുണ്ടായ ഇരട്ട സ്‌ഫോടനത്തിന് പിന്നില്‍ പാകിസ്ഥാനെന്ന് നാഷണല്‍ കോണ്‍ഫറൻസ്. ഞായറാഴ്ചയുണ്ടായ ആക്രമണം പാകിസ്ഥാൻ ഭീകരതയുടെ പുതിയ മാനമാണന്ന് പ്രവിശ്യാ പ്രസിഡന്‍റ് ദേവേന്ദർ സിങ് പറഞ്ഞു. ആക്രമണം അങ്ങേയറ്റം അപലപനീയമെന്നും വെല്ലുവിളിയാണെന്നും ദേവേന്ദര്‍ കൂട്ടിച്ചേര്‍ത്തു.
"ഇന്ത്യ-പാക് ബന്ധം മെച്ചപ്പെടുത്തുന്നതിനായി ജമ്മു കശ്മീരിലെ നിയന്ത്രണ രേഖയിലും അന്താരാഷ്ട്ര അതിർത്തിയിലും വെടിനിർത്തൽ കരാര്‍ നടപ്പാക്കുമെന്ന് അവര്‍ ഭാവിച്ചു. എന്നാല്‍ വീണ്ടും വീണ്ടും ആക്രമണങ്ങള്‍ നടത്തുകയാണ്. ഇത്തരം ഭീകരാക്രമണങ്ങളെ കശ്മീര്‍ ജനത ഭയക്കില്ല. പാകിസ്ഥാന്‍റെ ആക്രമണങ്ങള്‍ക്കെതിരെ ജനത ഒന്നിച്ച് പോരാടും" - ദേവേന്ദര്‍ സിങ് പറഞ്ഞു.