ചണ്ഡീഗഡ്: ഹരിയാനയില് അജ്ഞാതരുടെ വെടിയേറ്റ് താനും സഹോദരനും കൊല്ലപ്പെട്ടെന്ന വാര്ത്ത വ്യാജമെന്ന് ദേശീയ ഗുസ്തി താരം നിഷ ദാഹിയ. താന് ജീവനോടെയുണ്ടെന്നും സുഖമായിരിയ്ക്കുന്നുവെന്നും നിഷ ദാഹിയ പറഞ്ഞു. വീഡിയോ സന്ദേശത്തിലൂടെയാണ് ഗുസ്തി താരം ഇക്കാര്യം വ്യക്തമാക്കിയത്.
'ഞാന് സീനിയര് നാഷണല്സിന് വേണ്ടി ഗോണ്ടയിലാണ്. എനിക്ക് കുഴപ്പമൊന്നുമില്ല. കൊല്ലപ്പെട്ടുവെന്ന വാര്ത്ത വ്യാജമാണ്,' ഇന്ത്യന് ഗുസ്തി ഫെഡറേഷന് പുറത്തിറക്കിയ വീഡിയോയില് നിഷ പറഞ്ഞു. ഗുസ്തി താരവും ഒളിമ്പിക് മെഡല് ജേതാവുമായ സാക്ഷി മാലിക്കും നിഷക്ക് ഒപ്പം വീഡിയോയിലുണ്ട്.
സോനപത്തിലെ ഹലാല്പുരില് സുശീല് കുമാര് ഗുസ്തി അക്കാദമിയില് വച്ച് നിഷയും സഹോദരനും അജ്ഞാതരുടെ വെടിയേറ്റ് കൊല്ലപ്പെട്ടുവെന്ന റിപ്പോര്ട്ടുകള് ബുധനാഴ്ച വൈകീട്ടോടെയാണ് പുറത്ത് വന്നത്. നിഷയുടെ മാതാവിന്റെ നില ഗുരുതരമാണെന്നും റിപ്പോര്ട്ടുകളുണ്ടായിരുന്നു. ഇതിന് പിന്നാലെയാണ് വാര്ത്ത നിഷേധിച്ച് താരം തന്നെ രംഗത്തെത്തിയത്.
കഴിഞ്ഞ വെള്ളിയാഴ്ച സെര്ബിയിയില് വച്ച് നടന്ന അണ്ടര്-23 വേള്ഡ് ചാമ്പ്യന്ഷിപ്പില് 72 കിലോഗ്രാം വിഭാഗത്തില് നിഷ വെങ്കല മെഡല് സ്വന്തമാക്കിയിരുന്നു.
Also read: രാജസ്ഥാനില് ട്രക്കും ബസും കൂട്ടിയിച്ച് തീപിടിച്ചു; 11 പേര്ക്ക് ദാരുണാന്ത്യം