ന്യൂഡല്‍ഹി: വിലക്കയറ്റത്തില്‍ ലോക്‌സഭയില്‍ പ്ലക്കാർഡുമായി പ്രതിഷേധിച്ച നാല് കോൺഗ്രസ് എംപിമാരുടെ സസ്‌പെന്‍ഷന്‍ പിന്‍വലിച്ചു. ടിഎൻ പ്രതാപൻ, രമ്യ ഹരിദാസ്, മാണിക്കം ടാഗോർ, ജ്യോതി മണി എന്നിവരുടെ സസ്‌പെന്‍ഷനാണ് പിന്‍വലിച്ചത്. പാർലമെന്‍റിനകത്ത് പ്ലക്കാര്‍ഡ് കൊണ്ടുവരില്ലെന്ന വ്യവസ്ഥയിലാണ് കോണ്‍ഗ്രസ് എംപിമാരുടെ സസ്‌പെന്‍ഷന്‍ പിന്‍വലിച്ചത്.
എംപിമാരുടെ സസ്‌പെൻഷൻ നീക്കാനുള്ള പ്രമേയം ലോക്‌സഭയില്‍ പാസായതിന് പിന്നാലെ എംപിമാര്‍ സഭയ്‌ക്കകത്ത് പ്രവേശിച്ചു. പ്രതിപക്ഷ എംപിമാർ ഖേദം പ്രകടിപ്പിക്കുകയോ ചട്ടങ്ങൾക്ക് വിരുദ്ധമായ പ്ലക്കാർഡുകൾ കൊണ്ടുവരില്ലെന്ന് ഉറപ്പ് നല്‍കുകയോ ചെയ്‌താല്‍ സസ്‌പെൻഷൻ പിൻവലിക്കാനുള്ള പ്രമേയം അവതരിപ്പിക്കാൻ സർക്കാർ തയ്യാറാണെന്ന് നേരത്തെ കേന്ദ്രമന്ത്രി പിയൂഷ് ഗോയൽ വ്യക്തമാക്കിയിരുന്നു.