ചെന്നെെ: കഴിഞ്ഞ മൂന്ന് വര്‍ഷത്തെ അഴിമതി കേസുകളുടെ റിപ്പോര്‍ട്ട് സമര്‍പ്പിക്കാന്‍ തമിഴ്നാട് സര്‍ക്കാറിനോട് ഉത്തരവിട്ട് മദ്രാസ് ഹെെക്കോടതി. വില്ലാവാക്കം രജിസ്ട്രാറായിരുന്നയാളെ അഴിമതിക്കേസില്‍ പിടികൂടിയതിന് പിന്നാലെ ചെങ്കൽപേട്ട് ജില്ല സബ് രജിസ്ട്രാറായി നിയമിച്ച ഉത്തരവിനെ ചോദ്യം ചെയ്ത് സമര്‍പ്പിച്ച ഹര്‍ജി പരിഗണിക്കവെയാണ് കോടതിയുടെ നിര്‍ണായക ഉത്തരവ്.
ചീഫ് ജസ്റ്റിസ് സഞ്ജീവ് ബാനർജി, സെന്തിൽകുമാർ, രാമമൂർത്തി എന്നിവരടങ്ങിയ ബെഞ്ചാണ് കേസ് പരിഗണിച്ചത്. സംസ്ഥാനത്തെ അഴിമതി വിരുദ്ധ വകുപ്പ് രാഷ്ട്രീയ പാര്‍ട്ടികളുടെ സ്വാധീനമില്ലാതെയാണോ പ്രവര്‍ത്തിച്ചതെന്ന് ചോദിച്ചുകൊണ്ടായിരുന്നു കോടതി പ്രസ്തുത ഉത്തരവ് പുറപ്പെടുവിച്ചത്. അഴിമതി നമ്മെ കാര്‍ന്ന് തിന്നുന്ന ക്യാന്‍സറാണെന്നും ഇതാണ് എല്ലാ ഭൂമി കൈയേറ്റത്തിനും പിന്നിലെന്നും കോടതി പറഞ്ഞു.