ശ്രീനഗർ: ജമ്മു കശ്‌മീർ മുൻ മുഖ്യമന്ത്രിയും പിഡിപി നേതാവുമായ മെഹബൂബ മുഫ്‌തി വീണ്ടും വീട്ടുതടങ്കലിൽ. തന്‍റെ ട്വിറ്റർ അക്കൗണ്ടിലൂടെ മെഹബൂബ മുഫ്‌തി തന്നെയാണ് ഇക്കാര്യം അറിയിച്ചത്. ഗുപ്‌കർ പ്രദേശത്തെ തന്‍റെ വസതിയുടെ പൂട്ടിയ ഗേറ്റുകളുടെയും പുറത്ത് പാർക്ക് ചെയ്‌തിരിക്കുന്ന സിആർപിഎഫ് വാഹനത്തിന്‍റെയും ചിത്രങ്ങൾ സഹിതമായിരുന്നു മുഫ്‌തിയുടെ ട്വീറ്റ്.
അതേസമയം ഷോപിയാനിൽ ഭീകരരുടെ വെടിയേറ്റ് കൊല്ലപ്പെട്ട കശ്‌മീരി പണ്ഡിറ്റ് സുനിൽ കുമാർ ഭട്ടിന്‍റെ കുടുംബത്തെ സന്ദർശിക്കുന്നത് തടയാനാണ് തന്നെ വീട്ടുതടങ്കലിലാക്കിയതെന്ന് മെഹബൂബ മുഫ്‌തി പറഞ്ഞു. കേന്ദ്രസർക്കാരിന്‍റെ നയങ്ങളാണ് കശ്‌മീരി പണ്ഡിറ്റുകളെ ലക്ഷ്യം വച്ചുള്ള കൊലപാതകങ്ങളിലേക്ക് നയിച്ചതെന്നും മുഫ്‌തി ആരോപിച്ചു.