മല്ലികാർജുൻ ഖാർഗെ പ്രധാനമന്ത്രി സ്ഥാനാർത്ഥിയെന്ന് മമതയും കെജ്‌രിവാളും; ആദ്യം ജയിക്കണമെന്ന് ഖാർഗെ

PM Face of INDIA Bloc : ഡൽഹിയിൽ പുരോഗമിക്കുന്ന ഇന്ത്യ മുന്നണി യോഗത്തിലാണ് പ്രധാനമന്ത്രി സ്ഥാനാർത്ഥിയായി ഖാർഗെയെ ഉയർത്തിക്കാട്ടിയത്. പശ്ചിമ ബംഗാൾ മുഖ്യമന്ത്രി മമത ബാനർജിയും ഡൽഹി മുഖ്യമന്ത്രി അരവിന്ദ് കെജ്‌രിവാളും ചേർന്നാണ് ഖാർഗെയെ നാമനിർദേശം ചെയ്‌തതെന്ന്‌ ഡിഎംകെ നേതാവ് വൈക്കോ പറഞ്ഞു.

ന്യൂഡൽഹി: ഇന്ത്യ മുന്നണിയുടെ പ്രധാനമന്ത്രി സ്ഥാനാർത്ഥിയായി കോൺഗ്രസ് അധ്യക്ഷൻ ഖാർഗെയുടെ പേര് നിർദേശിച്ച് നേതാക്കൾ (Mallikarjun Kharge Proposed as PM Face of INDIA Bloc). ഡൽഹിയിൽ പുരോഗമിക്കുന്ന ഇന്ത്യ മുന്നണി യോഗത്തിലാണ് പ്രധാനമന്ത്രി സ്ഥാനാർത്ഥിയായി ഖാർഗെയെ ഉയർത്തിക്കാട്ടിയത്. പശ്ചിമ ബംഗാൾ മുഖ്യമന്ത്രി മമത ബാനർജിയും (Mamata Banerjee) ഡൽഹി മുഖ്യമന്ത്രി അരവിന്ദ് കെജ്‌രിവാളും (Arvind Kejriwal) ചേർന്നാണ് ഖാർഗെയെ നാമനിർദേശം ചെയ്‌തതെന്ന്‌ എംഡിഎംകെ നേതാവ് വൈക്കോ (MDMK leader Vaiko) പറഞ്ഞു.

വൈക്കോ മാത്രമാണ് ഈ വിഷയത്തിൽ പരസ്യ പ്രതികരണം നടത്തിയത്. മുന്നണി യോഗത്തിൽ പങ്കെടുത്ത മറ്റ് പ്രധാന നേതാക്കൾ പ്രതികരണത്തിൽ നിന്ന് വിട്ടുനിന്നു. പ്രധാനമന്ത്രി സ്ഥാനാർത്ഥിയെപ്പറ്റി അന്തിമ തീരുമാനം ഉണ്ടായിട്ടില്ലെന്നാണ് യോഗത്തിൽ പങ്കെടുത്ത പല നേതാക്കളും പ്രതികരിച്ചത്.

ആദ്യ ദളിത് പ്രധാനമന്ത്രി: 28 പ്രതിപക്ഷ പാർട്ടികൾ പങ്കെടുത്ത യോഗത്തിൽ രാജ്യത്തിന്‍റെ ആദ്യ ദളിത് പ്രധാനമന്ത്രി എന്ന നിലയിലാണ് ഖാർഗെയുടെ പേര് നിർദേശിക്കപ്പെട്ടത്. വിജയിക്കുക എന്നതാണ് പ്രധാനമെന്നും, ബാക്കി എല്ലാം പിന്നീട് തീരുമാനിക്കാമെന്നുമാണ് ഖാർഗെ ഇതേപ്പറ്റി പ്രതികരിച്ചത്. "ഞാൻ അധഃസ്ഥിതർക്ക് വേണ്ടിയാണ് പ്രവർത്തിക്കുന്നത്, ആദ്യം ജയിക്കട്ടെ, പിന്നെ കാണാം, ഞാൻ ഒന്നും ഇച്ഛിക്കുന്നില്ല." -ഖാർഗെ പറഞ്ഞു.

ഒരുമിച്ച് പൊതുയോഗങ്ങൾ: ഇന്ത്യ മുന്നണിയിലെ പാർട്ടികൾ സംസ്ഥാന തലത്തിലെ സീറ്റ് വിഭജന ചർച്ചകളിൽ ശ്രദ്ധ കേന്ദ്രീകരിക്കുമെന്നും, രാജ്യത്തുടനീളം പൊതുയോഗങ്ങൾ സംഘടിപ്പിക്കുമെന്നും ഖാർഗെ പറഞ്ഞു. " ഇന്ത്യ മുന്നണിയിലെ എല്ലാ പാർട്ടികളും സഖ്യം എങ്ങനെ മുന്നോട്ട് കൊണ്ടുപോകണമെന്നതിനെപ്പറ്റി ഏകകണ്‌ഠമായ തീരുമാനമെടുത്തു. രാജ്യത്തുടനീളം കുറഞ്ഞത് 8-10 പൊതുയോഗങ്ങളെങ്കിലും ഒരുമിച്ച് നടത്തും. മുന്നണിയിലെ അംഗങ്ങൾ ഒരുമിച്ച് ഒരേ വേദിയിൽ വന്നില്ലെങ്കിൽ ആളുകൾ സഖ്യത്തെക്കുറിച്ച് അറിയില്ല, എല്ലാവരും അത് സമ്മതിച്ചു." കോൺഗ്രസ് അധ്യക്ഷൻ വ്യക്തമാക്കി.

സംസ്ഥാന തലത്തിൽ സീറ്റ് വിഭജന ചർച്ചകൾ നടക്കും. എന്തെങ്കിലും പ്രശ്‌നങ്ങൾ ഉണ്ടായാൽ ഇന്ത്യ മുന്നണി നേതൃത്വം അത് പരിഹരിക്കുമെന്നും ഖാർഗെ വ്യക്തമാക്കി. കേരളമായാലും, തമിഴ്‌നാടായാലും, തെലങ്കാന, ബിഹാർ, യുപി, ഡൽഹി, പഞ്ചാബ് എന്നിങ്ങനെ ഏത് സംസ്ഥാനമായാലും സീറ്റ് വിഭജന പ്രശ്‌നങ്ങൾ പരിഹരിക്കപ്പെടുമെന്നും അദ്ദേഹം പറഞ്ഞു.

അതേസമയം ലോക്‌സഭയിലും രാജ്യസഭയിലും പ്രതിപക്ഷ എംപിമാരെ സസ്പെൻഡ് ചെയ്‌തതിനെ അപലപിച്ച് ഇന്ത്യ മുന്നണിയിലെ പാർട്ടികൾ പ്രമേയം പാസാക്കിയെന്നും ഖാർഗെ അറിയിച്ചു. ഡിസംബർ 22ന് ഇതിനെതിരെ പ്രതിഷേധം സംഘടിപ്പിക്കുമെന്നും ഖാർഗെ കൂട്ടിച്ചേർത്തു.