മലയാളി ദമ്പതികൾ മുംബൈയില്‍ മരിച്ച നിലയില്‍

ഇവരുടെ വീട്ടിർ നിന്നും ആത്മഹത്യാക്കുറിപ്പും പൊലീസ് കണ്ടെത്തി. ഏപ്രിലിൽ കൊവിഡ് ബാധിച്ച് ഭേദമായ ദമ്പതികൾക്ക് വീണ്ടും രോഗലക്ഷണങ്ങൾ കണ്ടുതുടങ്ങി. ഇതിനെതുടർന്നാണ് ഇരുവരും ആത്മഹത്യ ചെയ്‌തതെന്ന് കുറിപ്പിൽ പറയുന്നു.

മുംബൈ:മലയാളി നവദമ്പതികൾ മുംബൈയിൽ ആത്മഹത്യ ചെയ്‌ത നിലയിൽ. മുംബൈയിലെ ലോവർ പരേൽ പ്രദേശത്തെ ഭാരത് ടെക്സ്റ്റൈൽ മിൽ ടവറിലാണ് ദമ്പതികളുടെ മൃതദേഹം കണ്ടെത്തിയത്. മരിച്ചവർ അജയ് കുമാർ, സുജ എന്നിവരാണെന്ന് തിരിച്ചറിഞ്ഞു. വിവരം അറിഞ്ഞയുടൻ തന്നെ പൊലീസ് സംഭവസ്ഥലത്തെത്തി. മൃതദേഹങ്ങൾ മുംബൈയിലെ നായർ ആശുപത്രിയിലേക്ക് അയച്ച ശേഷമാണ് മരണം സ്ഥിരീകരിച്ചത്.

രണ്ടാമതും കൊവിഡ് ബാധ

ഇരുവരും കേരളത്തിൽ നിന്നുള്ളവരാണെന്നും പത്ത് മാസം മുമ്പാണ് ഇവർ വിവാഹിതരായതെന്നും പൊലീസ് അറിയിച്ചു. ആത്മഹത്യയാണെന്നാണ് പ്രാഥമിക നിഗമനം. ഇവരുടെ വീട്ടിൽ നിന്നും ആത്മഹത്യാക്കുറിപ്പും കണ്ടെടുത്തു. തങ്ങൾക്ക് കൊവിഡ് ബാധിച്ചതിനാൽ ആത്മഹത്യ ചെയ്യുകയാണെന്ന് കുറിപ്പിൽ പറയുന്നു. ഭർത്താവിന്‍റെ മൃതദേഹം അടുക്കളയിലും ഭാര്യയുടേത് ഹാളിലുമായാണ് കണ്ടെത്തിയത്.

ഏപ്രിലിലാണ് ഇരുവർക്കും കൊവിഡ് സ്ഥിരീകരിച്ചതിനെ തുടർന്ന് ആശുപത്രിയിൽ പ്രവേശിപ്പിച്ചത്. രോഗം പൂർണമായും ഭേദമായതിനു പിന്നാലെ ഇവർ വീട്ടിലേക്ക് മടങ്ങുകയും ചെയ്‌തു. എന്നാൽ വീണ്ടും ഇരുവർക്കും കൊവിഡ് ലക്ഷണങ്ങൾ കണ്ടുതുടങ്ങിയെന്നും ഇതിനെ തുടർന്ന് മനോവിഷമത്തിലായ ദമ്പതികൾ ആത്മഹത്യ ചെയ്‌തെന്നും പൊലീസ് പറയുന്നു.

കൂടുതൽ അന്വേഷണം തുടരുന്നു

മുംബൈയിലെ ഒരു സ്വകാര്യ കമ്പനിയിൽ ജോലിചെയ്‌തുവരികയായിരുന്നു അജയ്. ഭാര്യ സുജ ഒരു സ്വകാര്യ ബാങ്കിൽ ജോലി ചെയ്തിരുന്നു. സംഭവത്തിൽ അന്വേഷണം നടത്തിവരുന്നതായും കൂടുതൽ വിവരങ്ങൾ പോസ്‌റ്റ്‌മോർട്ടത്തിനു ശേഷം വ്യക്തമാകുമെന്നും പൊലീസ് അറിയിച്ചു.