ന്യൂഡൽഹി:കേരളത്തിലെ കൊവിഡ് കേസുകളിലുണ്ടാകുന്ന വർധനവിൽ ആശങ്ക പങ്കുവച്ച് കോൺഗ്രസ് നേതാവും വയനാട് എംപിയുമായ രാഹുൽ ഗാന്ധി. കൊവിഡ് രോഗികളുടെ എണ്ണത്തിലുണ്ടാകുവന്ന വർധനവ് ആശങ്കപ്പെടുത്തുന്നതാണെന്നും ജനം കൊവിഡ് മാനദണ്ഡങ്ങൾ കർശനമായി പാലിക്കണമെന്നും രാഹുൽ ഗാന്ധി പറഞ്ഞു.
സംസ്ഥാനത്തെ കൊവിഡ് പോസിറ്റിവിറ്റി നിരക്ക് 13.53 ആയി ഉയർന്ന സാഹചര്യത്തിലായിരുന്നു അദ്ദേഹത്തിന്‍റെ പ്രതികരണം. ട്വിറ്ററിലൂടെയായിരുന്നു അദ്ദേഹം ആശങ്ക പങ്കുവച്ചത്. കേരളത്തിൽ വ്യാഴാഴ്‌ച 22,064 പേര്‍ക്കാണ് കൊവിഡ് സ്ഥിരീകരിച്ചത്. സംസ്ഥാന കൊവിഡ് കേസുകൾ വർധിക്കുന്ന സാഹചര്യം കണക്കിലെടുത്ത് സ്ഥിതിഗതികൾ വിലയിരുത്തുന്നതിനായി കേന്ദ്ര സംഘം ഇന്ന് (ജൂലൈ 30) കേരളത്തിലെത്തുന്നുണ്ട്.
നാഷണൽ സെന്‍റർ ഫോർ ഡിസീസ് കൺട്രോൾ ഡയറക്ടർ എസ്.കെ സിങ്ങിന്‍റെ നേതൃത്വത്തിലുള്ള ആറംഗ സംഘമാണ് സംസ്ഥാനത്ത് എത്തുന്നത്. വിവിധ ജില്ലകളിലും കേന്ദ്ര സംഘം സന്ദർശനം നടത്തും.