രാജ്യത്ത് ഏറ്റവുമധികം വാക്‌സിൻ ഡോസുകൾ ഓർഡർ ചെയ്‌ത് ജമ്മു കശ്‌മീർ

എത്രയും വേഗം വാക്‌സിനേഷൻ പൂർത്തിയാക്കാൻ തങ്ങൾ പ്രതിജ്ഞാബദ്ധരാണെന്നും ബസീർ അഹ്മദ് ഖാൻ

ശ്രീനഗർ:രാജ്യത്ത് ഏറ്റവുമധികം കൊവിഡ് വാക്‌സിൻ ഡോസുകൾ ഓർഡർ ചെയ്‌ത ജമ്മു കശ്‌മീർ. കേന്ദ്ര ഭരണ പ്രദേശത്ത് മെഡിക്കൽ ഓക്‌സിജന്‍റെ കുറവില്ലെന്നും ലെഫ്റ്റനന്‍റ് ഗവർണറുടെ ഉപദേഷ്ടാവ് കഴിഞ്ഞ ദിവസം അറിയിച്ചു.

അടിയന്തരമായി വിളിച്ചുചേർത്ത വാര്‍ത്താസമ്മേളനത്തിൽ സംസാരിച്ച ബസീർ അഹ്മദ് ഖാൻ, കേന്ദ്രഭരണ പ്രദേശത്ത് മെഡിക്കൽ ഓക്‌സിജനോ റെംഡെസിവിർ പോലുള്ള മരുന്നുകളുടെ കുറവോ ഇല്ലെന്നും ജനങ്ങൾ ഈ കാര്യങ്ങളിൽ ഭയപ്പെടുത്തേണ്ടതില്ലെന്നുമാണ് പറഞ്ഞത്. 1.25 കോടി വാക്‌സിൻ ഡോസുകൾക്കായാണ് ജമ്മു കശ്‌മീർ ഓർഡർ നൽകിയിട്ടുള്ളത്. തങ്ങളുടെ പക്കൽ 20 ടൺ മെഡിക്കൽ ഓക്‌സിജൻ ഉണ്ടെന്നും അത് ആവശ്യമുള്ളതിനേക്കാൾ കൂടുതലാണെന്നും അദ്ദേഹം പറഞ്ഞു.

ഇന്ന് മുതൽ തന്നെ വാക്സി‌നേഷൻ ആരംഭിക്കുമെന്നും അദ്ദേഹം ഉറപ്പ് നൽകി. എത്രയും വേഗം വാക്‌സിനേഷൻ പൂർത്തിയാക്കാൻ തങ്ങൾ പ്രതിജ്ഞാബദ്ധരാണെന്നും അദ്ദേഹം പറഞ്ഞു. ആരോഗ്യ രംഗത്തെ സംവിധാനങ്ങൾ പരിശോധിക്കാനും കൊവിഡ് പിടിച്ചുകെട്ടാൻ സ്വീകരിച്ച നടപടികൾ പരിശോധിക്കാനും ലഫ്റ്റനന്‍റ് ഗവർണർ മനോജ് സിൻഹയുടെ നിർദേശപ്രകാരം താൻ ഏതാനം ദിവസങ്ങളായി താഴ്‌വരയിൽ തുടരുകയായിരുന്നെന്നും അദ്ദേഹം പറഞ്ഞു.

റെംഡെസിവിർ പോലുള്ള മരുന്നുകളുടെ കുറവുണ്ടെന്ന് ഒരു ധാരണ സൃഷ്‌ടിക്കപ്പെടുന്നുണ്ട്. ഒന്നിനും ഒരു കുറവുമില്ലെന്ന് ജനങ്ങൾക്ക് ഉറപ്പ് നൽകാൻ താൻ ആഗ്രഹിക്കുന്നു. തങ്ങൾ ഓർഡറുകൾ നൽകിയിട്ടുണ്ടെന്നും താമസിയാതെ ജമ്മു കശ്‌മീരിൽ ഇവ എത്തിച്ചേരുമെന്നും അദ്ദേഹം കൂട്ടിച്ചേർത്തു.

1,600 ഓക്‌സിജൻ കിടക്കകൾ നിലവിൽ കശ്‌മീർ ആശുപത്രികളിലുണ്ടെങ്കിലും ഇത് ഉടൻ 2,500 ആയി ഉയർത്തുമെന്ന് ഡിവിഷണൽ കമ്മിഷണർ പി.കെ. പോൾ പറഞ്ഞു. 1,600 ഓക്‌സിജൻ കിടക്കകൾ പ്രവർത്തനക്ഷമമാക്കണമെങ്കിൽ മിനിറ്റിൽ 3.2 കോടി ലിറ്റർ മാത്രമേ ആവശ്യമുള്ളൂവെന്നും അദ്ദേഹം പറഞ്ഞു. 3.2 കോടി ലിറ്റർ ആവശ്യത്തിനെതിരെ മിനിറ്റിൽ 5.43 കോടി ലിറ്റർ നിലവിൽ ലഭ്യമാണ്.

കഴിഞ്ഞ ആറ് ആഴ്‌ചയായി ജമ്മു കശ്‌മീരിൽ കൊവിഡ് കേസുകളുടെ എണ്ണം വർധിക്കുന്ന സാഹചര്യമാണ്. സജീവമായ കേസുകളുടെ എണ്ണം ഈ വർഷം മാർച്ച് 16 ന് വെറും 748 ൽ നിന്ന് 16,329 ആയി ഉയർന്നു. ശ്രീനഗർ ജില്ലയിൽ മാത്രം 8,000 സജീവ കൊവിഡ് കേസുകളുണ്ട്.