വിഭജനത്തിന്‍റെ ആഘാതങ്ങളെ പ്രധാനമന്ത്രി തന്‍റെ രാഷ്‌ട്രീയ പോരാട്ടങ്ങൾക്കായി ഉപയോഗിക്കുന്നു; ജയറാം രമേശ്

വിദ്വേഷത്തിന്‍റെ രാഷ്‌ട്രീയം പരാജയപ്പെടുമെന്നും ഇന്ത്യയെ ഒന്നിപ്പിക്കാനുള്ള ശ്രമങ്ങൾ കോൺഗ്രസ് തുടരുമെന്നും ജയറാം രമേശ്

ന്യൂഡൽഹി: ഓഗസ്റ്റ് 14 വിഭജന ഭീകര അനുസ്‌മരണ ദിനമായി ആചരിക്കാനുള്ള തീരുമാനത്തിലൂടെ വിഭജനത്തിന്‍റെ ആഘാതങ്ങളെ നിലവിലെ രാഷ്‌ട്രീയ പോരാട്ടങ്ങൾക്കായി ഉപയോഗിക്കാനാണ് പ്രധാനമന്ത്രി നരേന്ദ്ര മോദി ശ്രമിക്കുന്നതെന്ന് കോണ്‍ഗ്രസ് നേതാവ് ജയറാം രമേശ്‌. വിഭജനത്തിന്‍റെ ദുരന്തങ്ങളെ വിദ്വേഷവും മുൻവിധിയും വളർത്താനായി ദുരുപയോഗം ചെയ്യാൻ കഴിയില്ലെന്നും വിദ്വേഷത്തിന്‍റെ രാഷ്‌ട്രീയം പരാജയപ്പെടുമെന്നും ജയറാം രമേശ് പറഞ്ഞു.

'ഓഗസ്റ്റ് 14 വിഭജന ഭീതിയുടെ അനുസ്‌മരണ ദിനമായി ആചരിക്കുന്നതിലുള്ള പ്രധാനമന്ത്രിയുടെ യഥാർഥ ഉദ്ദേശം ഏറ്റവും ആഘാതകരമായ ചരിത്ര സംഭവങ്ങളെ തന്‍റെ നിലവിലെ രാഷ്‌ട്രീയ പോരാട്ടങ്ങൾക്ക് തീറ്റയായി ഉപയോഗിക്കുക എന്നതാണ്. വിഭജനത്തിലൂടെ ലക്ഷക്കണക്കിന് ആളുകൾക്ക് സ്ഥാനഭ്രംശം സംഭവിച്ചു, അവരുടെ ജീവൻ നഷ്‌ടപ്പെട്ടു. അവരുടെ ത്യാഗങ്ങൾ മറക്കാനോ അനാദരിക്കാനോ പാടില്ല', ജയറാം രമേശ് ട്വീറ്റ് ചെയ്‌തു.

'വിഭജനത്തിന്‍റെ ദുരന്തത്തെ വിദ്വേഷവും മുൻവിധികളും വളർത്താൻ ദുരുപയോഗം ചെയ്യാനാവില്ല. സവർക്കർ 2-രാഷ്ട്ര സിദ്ധാന്തം സൃഷ്‌ടിച്ചു, ജിന്ന അത് പരിപൂർണ്ണമാക്കി എന്നതാണ് സത്യം. 'നമ്മൾ വിഭജനം അംഗീകരിച്ചില്ലെങ്കിൽ ഇന്ത്യ പലതായി പിളരുമെന്ന് എനിക്ക് തോന്നി. അവ കഷണളായി പിളർന്ന് പൂർണ്ണമായും നശിപ്പിക്കപ്പെടും', എന്നാണ് സർദാർ വല്ലഭായി പട്ടേൽ എഴുതിയത്, ജയറാം രമേശ് ട്വിറ്ററിൽ കുറിച്ചു.

'ഇന്നത്തെ സവർക്കർമാരും ജിന്നമാരും' രാജ്യത്തെ വിഭജിക്കാനുള്ള ശ്രമങ്ങൾ തുടരുകയാണ്. എന്നാൽ മഹാത്മാഗാന്ധി, ജവഹർലാൽ നെഹ്‌റു, സർദാർ വല്ലഭായ് പട്ടേൽ എന്നിവരുടെ പാരമ്പര്യം ഉയർത്തിപ്പിടിച്ചുകൊണ്ട് ഇന്ത്യയെ ഒന്നിപ്പിക്കാനുള്ള ശ്രമങ്ങൾ കോൺഗ്രസ് തുടരുമെന്നും ജയറാം രമേശ്‌ വ്യക്‌തമാക്കി.