ദർബംഗ റെയിൽവേ സ്റ്റേഷൻ സ്‌ഫോടനം; ഐ‌എസ്‌ഐയ്‌ക്ക്‌ പങ്കുണ്ടോയെന്ന്‌ അന്വേഷണം

പാഴ്‌സലിനകത്തുണ്ടായിരുന്ന തുണിയിലൊളിപ്പിച്ച്‌ വച്ച സ്‌ഫോടകവസ്‌തു പൊട്ടിത്തെറിക്കുകയായിരുന്നു

പട്‌ന:ദർബംഗ റെയിൽവേ സ്റ്റേഷനിൽ പാഴ്‌സൽ വാനിലുണ്ടായ സ്‌ഫോടനത്തിൽ പാകിസ്ഥാൻ രഹസ്യാന്വേഷണ ഏജൻസിയായ ഐ‌എസ്‌ഐയ്‌ക്ക്‌ പങ്കുണ്ടോയെന്ന്‌ സംശയം. ഐ‌എസ്‌ഐയുടെ പങ്ക്‌ കണ്ടെത്താൻ അന്വേഷണം ആരംഭിച്ചതായാണ്‌ വിവരം. പാഴ്‌സൽ ബുക്ക്‌ ചെയ്‌ത ആളെ കണ്ടെത്തിയെന്ന്‌ അന്വേഷണ സംഘം അറിയിച്ചു.

സെക്കന്തരാബാദ് സ്വദേശിയായ മുഹമ്മദ് സുഫിയാന്‍റെ വിലാസത്തിലാണ്‌ പാഴ്‌സൽ വന്നത്‌. പാഴ്‌സൽ, വാനിൽ സെക്കന്തരാബാദ്-ദർബംഗ എക്‌സ്‌പ്രസിലേക്ക്‌ എത്തിക്കുന്ന സമയത്താണ്‌ സ്‌ഫോടനമുണ്ടായത്‌.

പാഴ്‌സലിനകത്തുണ്ടായിരുന്ന തുണിയിലൊളിപ്പിച്ച്‌ വച്ച സ്‌ഫോടകവസ്‌തു പൊട്ടിത്തെറിക്കുകയായിരുന്നു. ജൂൺ 17നായിരുന്നു കേസിനാസ്‌പദമായ സംഭവം. സ്‌ഫോടനത്തിൽ ആളപായമില്ല.