അഹമ്മദാബാദ് :കൊവിഡിൽ നിന്നും മുക്‌തനായി സീനിയർ ഓപ്പണർ ശിഖർ ധവാൻ തിരിച്ചെത്തുന്നു.പരമ്പര തൂത്തുവാരാൻ ലക്ഷ്യമിടുന്ന ഇന്ത്യക്ക് ധവാന്റെ വരവ് കൂടുതൽ ശക്‌തിയേകും. വെള്ളിയാഴ്‌ചയാണ് വെസ്‌റ്റിൻഡീസിനെതിരായ മൂന്നാം ഏകദിനം. ആദ്യ രണ്ട് മത്സരങ്ങളിലും ശരാശരി പ്രകടനം നടത്തിയാണ് ഇന്ത്യ വിജയിച്ചത്.
ധവാനും ഒരു റിസർവ് ബൗളറും ഉൾപ്പടെ നാല് താരങ്ങൾക്ക് പരമ്പരയ്ക്ക് മുൻപായി കൊവിഡ് ബാധിച്ചിരുന്നു. എന്നാൽ താരം തിരിച്ചെത്തിയതിനാൽ ഓപ്പണിങ്ങിൽ മാറ്റങ്ങൾ വരുത്താൻ ടീം മാനേജ്മെന്റ് നിർബന്ധിതരാകും.
ധവാന്റെ അഭാവത്തിൽ ആദ്യ മത്സരത്തിൽ ഇഷാൻ കിഷനെയും രണ്ടാം മത്സരത്തിൽ ഋഷഭ് പന്തിനെയും ടീം മാനേജ്മെന്റ് പരീക്ഷിച്ചു. 'ശിഖറിനെ അടുത്ത മത്സരത്തിൽ തിരികെ കൊണ്ടുവരും, അദ്ദേഹത്തിന് കുറച്ച് സമയം ആവശ്യമാണ്. ഇത് എല്ലായ്‌പ്പോഴും ഗുണം ചെയ്യില്ല. ഒരു പരീക്ഷണത്തിനായി ആഗ്രഹിക്കുന്നു' - രോഹിത് പറഞ്ഞു.