തിരുവളളൂര്‍: തമിഴ്‌നാട്ടിലെ ആദ്യ ട്രാന്‍സ്‌ജെന്‍ഡര്‍ പഞ്ചായത്ത് സെക്രട്ടറിയായി ദാക്ഷായണി സത്യപ്രതിജ്ഞ ചെയ്‌തു. 2015 ന് ശേഷം മാനസിക വിഭ്രാന്തി കാരണം ജോലിയില്‍ നിന്ന് വിട്ടുനിന്ന ചന്ദന്‍രാജാണ് പൂര്‍ണമായി ട്രാന്‍സ്‌ജെന്‍ഡര്‍ ആയി മാറിയ ശേഷം സത്യപ്രതിജ്ഞ ചെയ്‌ത് വീണ്ടും ജോലിയില്‍ പ്രവേശിച്ചത്. 2020ലാണ് ദാക്ഷായണി ജോലിയില്‍ പ്രവേശിക്കാനുള്ള അപേക്ഷ വീണ്ടും സമര്‍പ്പിച്ചത്.
തമിഴ്‌നാട്ടിൽ ഇതാദ്യമായാണ് ഒരു ട്രാൻസ്‌ജെൻഡറിന് ഗ്രാമവികസന വകുപ്പിൽ ജോലി നല്‍കുന്നത്. കൂടാതെ ട്രാൻസ്‌ജെൻഡർമാർക്ക് സർക്കാർ ജോലിയിൽ സംവരണം നൽകണം. അവരുടെ കഴിവുകൾക്ക് അംഗീകാരം നൽകണമെന്നും സത്യപ്രതിജ്ഞയ്‌ക്ക് ശേഷം ദാക്ഷായണി തമിഴ്‌നാട് സർക്കാരിനോട് അഭ്യർത്ഥിച്ചു.