തെലങ്കാന: കത്രീന കെയ്‌ഫ്‌-വിക്കി കൗശല്‍, മൗനി റോയ്‌-സൂരജ്‌ നമ്പ്യാര്‍ എന്നീ താര വിവാഹങ്ങള്‍ക്ക്‌ ശേഷം മറ്റൊരു താര വിവാഹം കൂടി. ഫര്‍ഹാന്‍ അക്തറും കാമുകി ഷിബാനി ദണ്ഡേക്കറും വിവാഹിതരാകുന്നു. ഫെബ്രുവരി 21നാണ് വിവാഹം.
Javed Akhtar confirms Farhan Shibani wedding: ഫര്‍ഹാന്‍റെ പിതാവ്‌ ജാവേദ് അക്തറാണ് വിവാഹ വാര്‍ത്ത സ്ഥിരീകരിച്ചിരിക്കുന്നത്‌. ഒരു മാധ്യമത്തിന് നല്‍കിയ അഭിമുഖത്തിലാണ് ജാവേദ് ഇക്കാര്യം വ്യക്തമാക്കിയത്‌. വിവാഹം വളരെ ലളിതമായി ഖണ്ഡലയിലെ കുടുംബ വീട്ടില്‍ വച്ച്‌ നടക്കുമെന്നും അദ്ദേഹം പറഞ്ഞു.
ഫര്‍ഹാന്‍- ഷിബാനി വിവാഹം ഈ മാസം ഉണ്ടാകുമെന്ന്‌ നേരത്തെ തന്നെ റിപ്പോര്‍ട്ടുകളുണ്ടായിരുന്നു. ഈ സാഹചര്യത്തിലാണ് ജാവേദ് അക്തർ വിവാഹ തീയതി ഔദ്യോഗികമായി സ്ഥിരീകരിക്കുകയും വിവാഹത്തെക്കുറിച്ചുള്ള രസകരമായ ചില വിവരങ്ങൾ പങ്കു വയ്ക്കുകയും ചെയ്‌തത്‌.
കൊവിഡ് സാഹചര്യത്തില്‍ അടുത്ത സുഹൃത്തുക്കളെയും കുടുംബാംഗങ്ങളെയും മാത്രം വിവാഹ ചടങ്ങില്‍ ക്ഷണിക്കാനാണ് ഫർഹാന്‍റെയും ഷിബാനിയുടെയും കുടുംബങ്ങൾ പദ്ധതിയിടുന്നത്‌.
വിവാഹത്തിന്‍റെ ബാക്കിയുള്ള ഒരുക്കങ്ങള്‍ അത്‌ വിവാഹ ആസൂത്രകര്‍ നോക്കുമെന്നും ജാവേദ് പറയുന്നു. 'കൊവിഡ് സാഹചര്യത്തില്‍ തങ്ങൾ വലിയ ആഘോഷ പരിപാടികള്‍ ഒഴിവാക്കിയാണ് വിവാഹം നടത്തുന്നത്‌. വിവാഹ ചടങ്ങില്‍ കുറച്ച് ആളുകളെ മാത്രമേ ക്ഷണിക്കൂ. ഇത് വളരെ ലളിതമായ ചടങ്ങായിരിക്കും. ഇനിയും വിവാഹ ക്ഷണം ആരംഭിച്ചിട്ടില്ല.'-ജാവേദ് അക്തര്‍ വ്യക്തമാക്കി.