അവന്തിപോര (ജമ്മു കശ്‌മീർ) : ജമ്മു കശ്‌മീരിലെ അവന്തിപോരയിലെ രാജ്‌പോര മേഖലയിലുണ്ടായ ഏറ്റുമുട്ടലിൽ രണ്ട് ഭീകരർ കൊല്ലപ്പെട്ടു. തിങ്കളാഴ്‌ച (30.05.2022) വൈകിട്ടാണ് സംഭവം. ട്രാൽ പ്രദേശത്തെ ഷാഹിദ് റാത്തർ, ഷോപ്പിയാനിൽ നിന്നുള്ള ഉമർ യൂസഫ് എന്നിവരാണ് കൊല്ലപ്പെട്ടതെന്ന് പൊലീസ് അറിയിച്ചു.
കൊല്ലപ്പെട്ട ഭീകരരിൽ നിന്ന് രണ്ട് എകെ 47 തോക്കുകൾ ഉൾപ്പടെയുള്ള ആയുധങ്ങൾ കണ്ടെത്തിയതായി ഉദ്യോഗസ്ഥർ അറിയിച്ചു. തീവ്രവാദ കുറ്റകൃത്യങ്ങൾക്ക് പുറമെ പുൽവാമയിലെ അരിപാൽ സ്വദേശി ഷക്കീലയെയും ലുർഗാം ത്രാലിലെ സർക്കാർ ജീവനക്കാരനായ ജാവിദ് അഹമ്മദിനെയും കൊലപ്പെടുത്തിയ കേസിൽ തീവ്രവാദി ഷാഹിദിന് പങ്കുണ്ടെന്ന് കശ്‌മീർ ഐജിപി ട്വീറ്റ് ചെയ്‌തു.