'കൊവിഡ് നിയന്ത്രണത്തിന് സൈന്യം'; മറുപടി നല്‍കാന്‍ കേന്ദ്രത്തിന് കോടതി നിര്‍ദേശം

ഓക്​സിജൻ വിതരണം സമയോചിതമായി നടപ്പാക്കാൻ ​ സൈന്യത്തെ ചുമതലപ്പെടുത്തണമെന്നാവശ്യപ്പെട്ട് കേന്ദ്ര പ്രതിരോധ മന്ത്രി രാജ്​നാഥ്​ സിങ്ങിന്​ ഡല്‍ഹി ഉപമുഖ്യമന്ത്രി മനീഷ്​ സിസോദിയ കത്തെഴുതിരുന്നു.

ന്യൂഡൽഹി: സംസ്ഥാനത്ത് കൊവിഡ്​ പ്രതിരോധത്തിന്​ സൈന്യത്തിന്‍റെ സഹായം തേടിയ ഡൽഹി സർക്കാറിന്‍റെ ആവശ്യത്തിന്​​ മറുപടി നൽകാൻ കേന്ദ്രത്തോടാവശ്യപ്പെട്ട് ഡൽഹി ഹൈക്കോടതി. കൊവിഡ്​ ആശുപത്രികളിലേക്കും നിരീക്ഷണ സംവിധാനങ്ങളിലേക്കും തടസമില്ലാതെ ഓക്​സിജൻ വിതരണം ലഭ്യമാക്കുന്നതിന്‍റെ നിയന്ത്രണം സൈന്യത്തിന്​ കൈമാറണമെന്നാവശ്യപ്പെട്ട്​ ഡൽഹി സര്‍ക്കാര്‍ ഹൈക്കോടതിയില്‍ ഹർജി നൽകിയിരുന്നു. ഇതിന്‍റെ അടിസ്ഥാനത്തിലാണ്​ നിര്‍ദേശം.

ഓക്​സിജൻ ലഭ്യത, വിതരണം എന്നിവ ഉറപ്പുവരുത്തുന്ന ചുമതല ​സൈന്യത്തിന്​ കൈമാറണം. ​ഇത്തരം അവശ്യ സേവനങ്ങൾ കൈകാര്യം ചെയ്യാൻ അവിടെ മറ്റാരുമില്ലെന്ന്​ ഒരു അഭിഭാഷകൻ ഹൈക്കോടതിയെ അറിയിച്ചു. സംസ്​ഥാനത്തെ ആശുപത്രികളിലെ​ ഓക്​സിജൻ ക്ഷാമവുമായി ബന്ധപ്പെട്ട പ്രശ്​നങ്ങൾ ഡൽഹി ഹൈക്കോടതി പരിഗണിച്ചിരുന്നു. മുതിർന്ന അഭിഭാഷകൻ രാഹുൽ മെഹ്​റയാണ്​ ഡൽഹി സർക്കാറിന്​ വേണ്ടി ഹാജരായത്​.

ഓക്​സിജൻ വിതരണം സമയോചിതമായി നടപ്പാക്കാൻ ​ സൈന്യത്തെ ഏൽപ്പിക്കണമെന്ന ആവശ്യവുമായി കേന്ദ്ര പ്രതിരോധ മന്ത്രി രാജ്​നാഥ്​ സിങ്ങിന്​ ഉപമുഖ്യമന്ത്രി മനീഷ്​ സിസോദിയ കത്തെഴുതിയിട്ടുണ്ട്. ആശുപത്രിയുടെ നിയന്ത്രണം ജില്ല മജിസ്​ട്രേറ്റ്​ ഏറ്റെടുക്കണമെന്ന ആവശ്യം ദ്വാരക ആശുപത്രി അധികൃതർ ഹൈക്കോടതിയിൽ ഉന്നയിച്ചിരുന്നു.

കൊവിഡ്​ രണ്ടാം തരംഗത്തിന്റെ പശ്ചാത്തലത്തിൽ ഡൽഹിയിലെ ആശുപത്രികളുടെ പ്രവർത്തനം ഒന്നടങ്കം തകിടം മറിഞ്ഞിരിക്കുകയാണ് . പല ആശുപത്രികളിലും ഓക്​സിജൻ ക്ഷാമവും കിടക്കകളുടെ അഭാവവും വെല്ലുവിളിയാകുന്നുണ്ട്​.ഓക്​സിജൻ ലഭ്യമല്ലാത്ത കാരണത്താൽ ശനിയാഴ്ച മാത്രം മുതിർന്ന ഡോക്​ടർമാര്‍ അടക്കം 12 കൊവിഡ്​ രോഗികളാണ്​ ബത്ര ആശുപത്രിയിൽ മരണത്തിന് കീഴടങ്ങിയത് .