ചെന്നൈ : അജിത് നായകനായ 'തുനിവി'ന്‍റെ റിലീസ് ആഘോഷത്തിനിടെ ലോറിക്ക് മുകളിൽ നൃത്തം ചെയ്യുന്നതിനിടെ ആരാധകൻ താഴെ വീണുമരിച്ചു. ചെന്നൈയിലെ രോഹിണി തിയേറ്ററിന് മുന്നിൽ പുലർച്ചെ ഒരുമണിയോടെയായിരുന്നു സംഭവം. ചിന്താദ്രിപേട്ട് റിച്ചി സ്‌ട്രീറ്റ് സ്വദേശി ഭരത് കുമാറാണ് (19) മരിച്ചത്.
'തുനിവ്' റിലീസ് ആഘോഷത്തിൽ ലോറിയിൽ നൃത്തം ചെയ്യുന്നതിനിടെ വീണു ; അജിത് ആരാധകന് ദാരുണാന്ത്യം
അപകടം അജിത്തിന്‍റെ പുതിയ ചിത്രമായ 'തുനിവി'ന്‍റെ സ്‌പെഷ്യൽ ഷോയോടനുബന്ധിച്ച്
അജിത് ആരാധകൻ ലോറിയിൽ നിന്ന് വീണ് മരിച്ചു
സ്‌പെഷ്യൽ ഷോ പ്രദർശനത്തിന് നിരവധി ആരാധകരാണ് തിയേറ്ററിലെത്തിയത്. ഇതിനിടെ ഭരത് പൂന്തമല്ലി ഹൈവേയിൽ ഓടുന്ന ലോറിയിൽ ആഹ്ളാദ പ്രകടനം നടത്തുകയായിരുന്നു. ശേഷം ലോറിയിൽ നിന്ന് താഴേക്ക് ചാടിയപ്പോൾ നട്ടെല്ലിന് സാരമായി പരിക്കേറ്റു.
ഉടനെ കെഎംസി ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചു. കോയമ്പേട് ട്രാഫിക് ഇൻവെസ്റ്റിഗേഷൻ ഡിവിഷൻ പൊലീസ് കേസെടുത്ത് അന്വേഷണം ആരംഭിച്ചു.