കൊവിഡ് വ്യാപനം രൂക്ഷം; പുതിയ മാർഗരേഖ പുറത്തിറക്കി രാജസ്ഥാൻ

പുതിയ മാർഗരേഖയുടെ അടിസ്ഥാനത്തിൽ സംസ്ഥാനത്ത് വെള്ളിയാഴ്‌ച മുതൽ രാത്രികാല കർഫ്യു ഏർപ്പെടുത്താൻ തീരുമാനമായി. രാത്രി 11 മണി മുതൽ പുലർച്ചെ അഞ്ച് വരെയാണ് കർഫ്യു.

ജയ്‌പൂർ:സംസ്ഥാനത്ത് കൊവിഡ് വ്യാപനം രൂക്ഷമായ സാഹചര്യത്തിൽ പുതിയ കൊവിഡ് മാർഗരേഖ പുറത്തിറക്കി രാജസ്ഥാൻ സർക്കാർ. പുതിയ മാർഗരേഖയുടെ അടിസ്ഥാനത്തിൽ സംസ്ഥാനത്ത് വെള്ളിയാഴ്‌ച മുതൽ രാത്രികാല കർഫ്യു ഏർപ്പെടുത്തും. രാത്രി 11 മണി മുതൽ പുലർച്ചെ അഞ്ച് വരെയാണ് കർഫ്യു.

ഇതര സംസ്ഥാനത്ത് നിന്ന് രാജസ്ഥാനിലേക്ക് എത്തുന്നവര്‍ 72 മണിക്കൂറിന് മുമ്പുള്ള ആര്‍ടിപിസിആര്‍ പരിശോധന ഫലം കൈയില്‍ കരുതണം. ഇരു ഡോസ് വാക്സിൻ സ്വീകരിച്ചവര്‍ക്ക് ഇളവുണ്ട്. ഒരു ഡോസ് വാക്സിൻ സ്വീകരിച്ചവര്‍ അതിന്‍റെ രേഖയും കൈയില്‍ കരുതണം.

സംസ്ഥാനത്ത് ഏറ്റവും കൂടുതൽ കൊവിഡ് കേസുകൾ റിപ്പോർട്ട് ചെയ്യപ്പെടുന്ന ജയ്‌പൂർ, ജോധ്പൂർ മുനിസിപ്പൽ കോർപ്പറേഷൻ പരിധിയിലെ ഒന്ന് മുതൽ എട്ട് വരെയുള്ള ക്ലാസിലെ കുട്ടികൾക്ക് ജനുവരി 7 മുതൽ 17 വരെ അവധി നൽകാൻ സർക്കാർ തീരുമാനിച്ചു. സംസ്ഥാനത്തെ മറ്റ് ജില്ലകളിൽ കലക്‌ടർമാരും ജില്ല മജിസ്ട്രേറ്റും വിദ്യാഭ്യാസ വകുപ്പ് അഡീഷണൽ ചീഫ് സെക്രട്ടറിയുമായി ചർച്ച നടത്തിയ ശേഷം സ്‌കൂൾ നടത്തിപ്പ് സംബന്ധിച്ച് തീരുമാനമെടുക്കും.

ഓഫിസുകൾക്ക് 50 ശതമാനം ജീവനക്കാരെ വച്ച് മാത്രമാണ് പ്രവർത്തനാനുമതി നൽകിയിട്ടുള്ളത്. സർക്കാർ ഓഫിസുകൾ കൊവിഡ് പ്രോട്ടോക്കോൾ പാലിച്ച് പ്രവർത്തിക്കും. സർക്കാർ ഓഫിസുകളിൽ കൊവിഡ് പ്രോട്ടോക്കോൾ പാലിക്കേണ്ടതിന്‍റെ ഉത്തരവാദിത്തം ബന്ധപ്പെട്ട ഓഫിസ് മേധാവിയുടേതായിരിക്കും. ഭിന്നശേഷിക്കാർ, ഗർഭിണികൾ, 55 വയസോ അതിൽ കൂടുതലോ പ്രായമുള്ളവർ, വിട്ടുമാറാത്ത രോഗങ്ങൾ ഉള്ളവർ എന്നിവർക്ക് ഓഫിസുകളിൽ വരേണ്ടതില്ല. അവർക്ക് വീട്ടിലിരുന്ന് ജോലി ചെയ്‌താൽ മതിയാകും.

ഏതെങ്കിലും ജീവനക്കാരന് കൊവിഡ് സ്ഥിരീകരിച്ചാൽ ബന്ധപ്പെട്ട ഓഫിസ് 72 മണിക്കൂർ അടച്ചിടാനും മറ്റ് ജീവനക്കാർക്ക് വീട്ടിലിരുന്ന് ജോലി ചെയ്യുന്നതിന് അനുമതി നൽകാനും ഓഫിസ് മേധാവിക്ക് അധികാരമുണ്ട്.