ഗ്യാന്‍വാപി സർവേ; ശാസ്‌ത്രീയ സർവേയ്‌ക്ക് കൂടുതൽ സമയം തേടുന്നതിൽ അതൃപ്‌തി പ്രകടിപ്പിച്ച് കോടതി

Gyanvapi Survey Report : മസ്‌ജിദിന്‍റെ ശാസ്‌ത്രീയ സർവേ റിപ്പോർട്ട് സമർപ്പിക്കാൻ ഇതിനുമുൻപ് അഞ്ച് തവണ സമയം നീട്ടി നൽകിയിരുന്നു. സാങ്കേതിക കാരണങ്ങൾ ചൂണ്ടിക്കാട്ടി റിപ്പോർട്ട് സമർപ്പിക്കുന്നത് ആറാമതും നീട്ടാനാണ് ആര്‍ക്കിയോളജിക്കല്‍ സര്‍വേ ഓഫ് ഇന്ത്യയിലെ ഉദ്യോഗസ്ഥര്‍ ശ്രമിച്ചത്.

വാരാണസി: ഗ്യാന്‍വാപി മസ്‌ജിദ് സമുച്ചയത്തിന്‍റെ ശാസ്‌ത്രീയ സർവേ (Gyanvapi Mosque Complex Survey Work) പൂർത്തിയാക്കാന്‍ ആർക്കിയോളജിക്കൽ സർവേ ഓഫ് ഇന്ത്യ (Archaeological Survey of India) കൂടുതൽ സമയം തേടുന്നതിൽ അതൃപ്‌തി പ്രകടിപ്പിച്ച് വാരാണാസി ജില്ലാ കോടതി (Court Angry Over ASI on Gyanvapi Survey Report). പള്ളിയുടെ സർവേ റിപ്പോർട്ട് സമർപ്പിക്കാൻ മൂന്നാഴ്‌ച കൂടി സമയം വേണമെന്ന എഎസ്ഐയുടെ ഹർജി പരിഗണിക്കവെയാണ് കോടതി കടുത്ത അതൃപ്‌തി രേഖപ്പെടുത്തിയത്.

റിപ്പോർട്ട് സമർപ്പിക്കാൻ ഇതിനുമുൻപ് അഞ്ച് തവണ സമയം നീട്ടി നൽകിയിരുന്നു. ഇന്നലെ (ചൊവ്വാഴ്‌ച) സമർപ്പിക്കേണ്ടിയിരുന്ന റിപ്പോർട്ട് സാങ്കേതിക കാരണങ്ങൾ ചൂണ്ടിക്കാട്ടി ആറാമതും നീട്ടാനാണ് ഇന്ന് എഎസ്ഐ ശ്രമിച്ചത്. റിപ്പോർട്ടിൽ സാങ്കേതികമായി നിരവധി കാര്യങ്ങള്‍ പുതുതായി ചേർക്കാനുണ്ടെന്ന് ആർക്കിയോളജിക്കൽ സർവേ ഓഫ് ഇന്ത്യയെ പ്രതിനിധീകരിച്ച അഭിഭാഷകൻ ഇന്നലെ കോടതിയിയെ ബോധിപ്പിച്ചിരുന്നു. എന്നാൽ ഇന്നലെ ഈ അപേക്ഷയിൽ വാദം കേൾക്കാൻ കഴിഞ്ഞിരുന്നില്ല.

ഇന്ന് അപേക്ഷ പരിഗണിക്കവേ സമയപരിധി നീട്ടാനുള്ള ആവർത്തിച്ചുള്ള അപേക്ഷയിൽ കടുത്ത അതൃപ്‌തി രേഖപ്പെടുത്തിയ ജില്ലാ ജഡ്‌ജി എ കെ വിശ്വേഷ്, സമയം തേടുന്നത് എന്തിനെന്ന് വിശദമായി അറിയിക്കാൻ എഎസ്ഐയുടെ അഭിഭാഷകനോട് ആവശ്യപ്പെട്ടു. റിപ്പോർട്ട് എപ്പോൾ അവതരിപ്പിക്കുമെന്ന് അന്തിമമായി അറിയിക്കാനും അദ്ദേഹത്തോട് ആവശ്യപ്പെട്ടിട്ടുണ്ട്.

ആർക്കിയോളജിക്കൽ സർവേ ഓഫ് ഇന്ത്യയുടെ സമയപരിധി നീട്ടാനുള്ള അപേക്ഷയിൽ മുസ്‌ലിം വിഭാഗവും എതിർപ്പ് രേഖപ്പെടുത്തി. എഎസ്‌ഐ ആവർത്തിച്ച് കൂടുതൽ സമയം ആവശ്യപ്പെട്ടതിനെ മുസ്‌ലിം വിഭാഗത്തെ പ്രതിനിധീകരിച്ച അഭിഭാഷകനായ മുഹമ്മദ് ഇഖ്‌ലാഖ് എതിർത്തു. വീണ്ടും വീണ്ടും തീയതി നീട്ടാന്‍ ആവശ്യപ്പെടുന്നത് അനുചിതമാണെന്ന് അദ്ദേഹം ചൂണ്ടിക്കാട്ടി. ഇരു ഭാഗത്തിന്‍റെയും വാദം കേട്ട കോടതി, ആർക്കിയോളജിക്കൽ സർവേ ഓഫ് ഇന്ത്യയുടെ അപേക്ഷയിൽ വിധി പറയുന്നത് നാളത്തേക്ക് മാറ്റിവച്ചു.

കാശി വിശ്വനാഥ ക്ഷേത്രത്തിന് (Kashi Vishwanath Temple) സമീപമുള്ള, പതിനേഴാം നൂറ്റാണ്ടില്‍ നിര്‍മിതമായ ഗ്യാന്‍വാപി മസ്‌ജിദ് ഹിന്ദു ക്ഷേത്രത്തിന് മുകളിലാണോ പണിതിരിക്കുന്നത് എന്ന് നിർണയിക്കുന്നതിനായാണ് പള്ളി പരിസരത്ത് എഎസ്‌ഐ ശാസ്‌ത്രീയ സർവേ നടത്തുന്നത്. സര്‍വേ നടത്താനുള്ള വാരണാസി ജില്ലാ കോടതിയുടെ ഉത്തരവ് അലഹബാദ് ഹൈക്കോടതി ശരിവയ്‌ച്ചിരുന്നു. ഈ നടപടി അനിവാര്യമാണെന്നും, ഹിന്ദു-മുസ്‌ലിം വിഭാഗങ്ങൾക്ക് ഇത് ഗുണം ചെയ്യുമെന്നും ഹൈക്കോടതി നിരീക്ഷിച്ചതിന് ശേഷമാണ് സർവേ ആരംഭിച്ചത്.

എഎസ്‌ഐ സ്ഥലം പരിശോധിച്ചുവരികയാണ്. പല ഭാഗങ്ങളും ഇനിയും സർവേ നടത്താന്‍ ബാക്കിയുള്ളതിനാലും എന്നാല്‍ സർവേ ജോലികളുടെ സമയം കഴിഞ്ഞതിനാലും എട്ട് ആഴ്‌ചത്തെ അധിക സമയം കൂടി എഎസ്ഐ ആവശ്യപ്പെട്ടു. ഈ കാലാവധിയാണ് ഇന്നലെ (ചൊവ്വാഴ്‌ച) അവസാനിച്ചത്.