ചണ്ഡിഗഡ് : ചണ്ഡിഗഡ് മുനിസിപ്പൽ കോർപ്പറേഷൻ തെരഞ്ഞെടുപ്പിന്‍റെ അന്തിമ ഫലം പ്രഖ്യാപിച്ചു. മുനിസിപ്പൽ തിരഞ്ഞെടുപ്പില്‍ ആദ്യമായി മത്സരിച്ച ആം ആദ്‌മി പാർട്ടി 35ല്‍ 14 സീറ്റുകള്‍ നേടി ഏറ്റവും വലിയ ഒറ്റക്കക്ഷിയായി.
അതേസമയം മികച്ച ഭൂരിപക്ഷത്തില്‍ കഴിഞ്ഞ തവണ ഭരണത്തിലേറിയ ബിജെപിക്ക് 12 സീറ്റുകളിലാണ് വിജയിക്കാനായത്. കോണ്‍ഗ്രസ് എട്ട് സീറ്റുകളിലും ശിരോമണി അകാലിദൾ ഒരു സീറ്റിലും വിജയം നേടി.
നിലവിലെ ചണ്ഡിഗഡ് മേയറും ബിജെപി സ്ഥാനാർഥിയുമായ രവികാന്ത് ശർമയെ എഎപിയുടെ ദമൻപ്രീത് സിങ് പരാജയപ്പെടുത്തി. വാർഡ് നമ്പർ 17ൽ 828 വോട്ടിന്‍റെ ഭൂരിപക്ഷത്തിലാണ് എഎപി സ്ഥാനാര്‍ഥി ജയം പിടിച്ചത്.