'ആരോഗ്യ പ്രവർത്തകരുടെ സുരക്ഷ ഉറപ്പാക്കണം' ; സംസ്ഥാനങ്ങളോട് കേന്ദ്രം

രാജ്യത്തിന്‍റെ വിവിധ ഭാഗങ്ങളിൽ ഡോക്‌ടർമാർക്കെതിരെയുള്ള അതിക്രമങ്ങൾ റിപ്പോർട്ട് ചെയ്യുന്ന സാഹചര്യത്തിലാണ് നിർദേശം.

ന്യൂഡൽഹി: കൊവിഡ് വ്യാപനം നിലനിൽക്കുന്ന സാഹചര്യത്തിൽ രാജ്യത്തെ ആരോഗ്യ പ്രവർത്തകരുടെ സുരക്ഷയ്‌ക്കും ക്ഷേമത്തിനും ആവശ്യമായ നടപടികൾ സ്വീകരിക്കുന്നുവെന്ന് ഉറപ്പുവരുത്തുത്തണമെന്ന് സംസ്ഥാനങ്ങളോടും കേന്ദ്രഭരണ പ്രദേശങ്ങളോടും ആരോഗ്യ മന്ത്രാലയം. ഇതുസംബന്ധിച്ച് മന്ത്രാലയം വിശദമായ കത്തയച്ചു.

നിലവിലുള്ള പകർച്ചവ്യാധി നിയന്ത്രണ നിയമം കർശനമായി നടപ്പാക്കണമെന്ന നിർദേശത്തിന് പുറമേയാണിതെന്ന് കേന്ദ്ര ആരോഗ്യ മന്ത്രാലയം ജോയിന്‍റ് സെക്രട്ടറി ലാവ് അഗർവാൾ വ്യക്തമാക്കി.

രാജ്യത്തിന്‍റെ വിവിധ ഭാഗങ്ങളിൽ ഡോക്‌ടർമാർക്കെതിരെ നടന്ന അതിക്രമങ്ങളെ അദ്ദേഹം അപലപിച്ചു. ഇത്തരം പ്രവൃത്തികൾ മഹാമാരിക്കെതിരെ പോരാടുന്ന മുൻനിര പോരാളികളുടെ മനോവീര്യം തകര്‍ക്കും.

കൊവിഡിനെതിരെയുള്ള ആരോഗ്യപ്രവര്‍ത്തകരുടെ ശ്രമങ്ങളെ രാജ്യം വലിയ തോതിൽ പ്രശംസിച്ചുവെങ്കിലും അവർക്കെതിരെയുള്ള അതിക്രമങ്ങള്‍ ഇന്നും തുടരുന്നു.

ആരോഗ്യ പ്രവർത്തകരുടെ സുരക്ഷ ഉറപ്പുവരുത്തുന്നതിനായി പകർച്ചവ്യാധി നിയന്ത്രണ നിയമം ഉൾപ്പെടെ നിരവധി നടപടികൾ കേന്ദ്രം സ്വീകരിച്ചിട്ടുണ്ടെന്നും അദ്ദേഹം കത്തിൽ വ്യക്തമാക്കി.