ബെംഗളൂരു: കർണാടക മുൻ മന്ത്രി റോഷൻ ബെയ്ഗിന്റെ വസതിയിൽ ഡൽഹിയിൽ നിന്നെത്തിയ സിബിഐ സംഘം റെയ്ഡ് നടത്തുന്നു. നാലായിരം കോടിയോളം രൂപയുടെ ഐഎംഎ ജ്വല്ലറി നിക്ഷേപത്തട്ടിപ്പു കേസിൽ റോഷൻ ബെയ്ഗിനെ ഞായറാഴ്ച സിബിഐ അറസ്റ്റു ചെയ്തിരുന്നു. ഇന്നു രാവിലെ ആറരയോടെയാണ് ഡൽഹിയിൽ നിന്നുള്ള ഏഴംഗ സിബിഐ സംഘം റോഷൻ ബെയ്ഗിന്റെ പുലകേശിനഗറിലെ വസതിയിലെത്തിയത്.
കർണാടക മുൻ മന്ത്രി റോഷൻ ബെയ്ഗിന്റെ വസതിയിൽ സിബിഐ റെയ്ഡ്
ഇന്നു രാവിലെ ആറരയോടെയാണ് ഡൽഹിയിൽ നിന്നുള്ള ഏഴംഗ സിബിഐ സംഘം റോഷൻ ബെയ്ഗിന്റെ പുലകേശിനഗറിലെ വസതിയിലെത്തിയത്
കർണാടക മുൻ മന്ത്രി റോഷൻ ബെയ്ഗിന്റെ വസതിയിൽ സിബിഐ റെയ്ഡ്
നേരത്തേ, തെളിവുകളുടെ അടിസ്ഥാനത്തിൽ സിബിഐ ബെയ്ഗിനെ വിളിച്ചവരുത്തി ചോദ്യം ചെയ്തിരുന്നു. പിന്നീടാണ് അറസ്റ്റു ചെയ്ത് പ്രത്യേക കോടതി ജഡ്ജിയുടെ കോറമംഗലയിലെ വസതിയിൽ ഹാജരാക്കിയത്. 14 ദിവസത്തെ ജുഡീഷ്യൽ കസ്റ്റഡിയിൽ റിമാൻഡ് ചെയ്തിട്ടുണ്ട്. മലയാളികൾ അടക്കം ആയിരക്കണക്കിനു നിക്ഷേപകർ കബളിപ്പിക്കപ്പെട്ട കേസാണിത്. സിബിഐ കേസ് ഏറ്റെടുക്കും മുൻപ് 2019 ജൂലൈയിൽ പ്രത്യേക അന്വേഷണ സംഘം ബെയ്ഗിനെ ചോദ്യം ചെയ്തിരുന്നു.
2019 ഓഗസ്റ്റിൽ കർണാടക സർക്കാർ അഴിമതി കേസുകൾ സിബിഐക്ക് കൈമാറിയിരുന്നു, അതിൽ നിരവധി രാഷ്ട്രീയക്കാരും മുതിർന്ന സർക്കാർ ഉദ്യോഗസ്ഥരും പ്രതികളാണ്. നേരത്തെ, സംസ്ഥാന സർക്കാർ രൂപീകരിച്ച എസ്ഐടി, ഐഎംഎ കേസ് അന്വേഷിച്ചുവരികയായിരുന്നു. നിക്ഷേപത്തിൽ നിന്ന് മികച്ച വരുമാനം വാഗ്ദാനം ചെയ്ത് ധാരാളം നിക്ഷേപകരെ കമ്പനി വഞ്ചിച്ചുവെന്ന് ആരോപിച്ച് എസ്ഐടി ഇതിനകം നിരവധി സർക്കാർ ഉദ്യോഗസ്ഥരെ അറസ്റ്റ് ചെയ്യുകയും രാഷ്ട്രീയക്കാർ ഉൾപ്പെടെയുള്ളവരെ ചോദ്യം ചെയ്യുകയും ചെയ്തിട്ടുണ്ട്. അഴിമതിയുമായി ബന്ധപ്പെട്ട് നിരവധി പരാതികൾ രജിസ്റ്റർ ചെയ്തതിനെത്തുടർന്ന് രാജ്യം വിട്ട് പോയ പ്രധാന പ്രതിയും ഐ.എം.എയുടെ മാനേജിംഗ് ഡയറക്ടറുമായ മുഹമ്മദ് മൻസൂർ ഖാനും അറസ്റ്റിലായിരുന്നു.