ന്യൂഡൽഹി :മദ്യനയ അഴിമതി കേസുമായി ബന്ധപ്പെട്ട് ഡൽഹി ഉപമുഖ്യമന്ത്രിയും ആം ആദ്‌മി പാർട്ടി നേതാവുമായ മനീഷ് സിസോദിയയെ സിബിഐ ചോദ്യം ചെയ്യുന്നു. അതിനിടെ സിബിഐ ഓഫിസിന് മുന്നിൽ പ്രതിഷേധിച്ച സഞ്ജയ് സിങ്, ഗോപാൽ റായ് ഉൾപ്പടെയുള്ള നിരവധി എഎപി നേതാക്കളെ പൊലീസ് കസ്റ്റഡിയിലെടുത്തു. തെക്കൻ ജില്ലയിൽ സെക്ഷൻ 144 പ്രകാരം നിരോധനാജ്ഞ ഏർപ്പെടുത്തിയതായും ഉദ്യോഗസ്ഥർ അറിയിച്ചു.
'തെമ്മാടിത്തം അതിന്‍റെ ഉച്ചസ്ഥായിയിൽ':ക്രമസമാധന നില തകരാതിരിക്കാനാണ് പ്രതിഷേധകരെ കസ്റ്റഡിയിലെടുത്തതെന്ന് പൊലീസ് വ്യക്തമാക്കി. അതേസമയം സമാധാനപരമായി പ്രതിഷേധിച്ച നേതാക്കളെയാണ് പൊലീസ് പിടികൂടിയതെന്ന് ആം ആദ്‌മി പാർട്ടി എംഎൽഎ കുൽദീപ് കുമാർ പറഞ്ഞു. പൊലീസ് നടപടിയോട് പ്രതികരിച്ച ഡൽഹി പരിസ്ഥിതി മന്ത്രി ഗോപാൽ റായ്, മോദിയുടെ തെമ്മാടിത്തം അതിന്‍റെ ഉച്ചസ്ഥായിയിൽ ആണെന്ന് ട്വീറ്റിൽ ആരോപിച്ചു.
മറ്റൊരാളുടെ സഹായമില്ലാതെ നടക്കാൻ പോലും കഴിയാത്തയാളാണ്. എന്നിട്ടും തന്‍റെ കാര്‍ പൊലീസ് വളയുകയും വാഹനത്തിലുണ്ടായിരുന്ന സഹായിയെ ബലമായി ഇറക്കിവിടുകയും ചെയ്‌തുവെന്നും ഗോപാൽ റായ് ആരോപിച്ചു. ഉദ്യോഗസ്ഥർ തന്‍റെ കാറിനുള്ളിൽ അതിക്രമിച്ചുകയറി തന്നെ പിടിച്ചുകൊണ്ടുപോവുകയായിരുന്നു. പക്ഷേ ഈ തെമ്മാടിത്തത്തിൽ തങ്ങൾ ഭയപ്പെടുകയോ അടിയറവ് പറയുകയോ ഇല്ലെന്നും അദ്ദേഹം ട്വീറ്റിൽ കൂട്ടിച്ചേർത്തു.
ചോദ്യം ചെയ്യൽ രണ്ടാം തവണ : ഡൽഹി മദ്യനയ അഴിമതി കേസിൽ ഇത് രണ്ടാം തവണയാണ് സിസോദിയയെ സിബിഐ ചോദ്യം ചെയ്യുന്നത്. നേരത്തേ ഒക്‌ടോബർ 17ന് അദ്ദേഹത്തെ ചോദ്യം ചെയ്‌തിരുന്നു. ചോദ്യം ചെയ്യലിന് മുന്നോടിയായി അദ്ദേഹം രാജ്‌ഘട്ടിലെ മഹാത്മാഗാന്ധിയുടെ സ്‌മാരകം സന്ദർശിച്ചു.
'ഇന്ന് സിബിഐയ്‌ക്ക് മുന്നിൽ ചോദ്യം ചെയ്യലിന് ഹാജരാകും. അന്വേഷണത്തോട് പൂർണമായും സഹകരിക്കും. ലക്ഷക്കണക്കിന് കുട്ടികളുടെ സ്‌നേഹവും കോടിക്കണക്കിന് ജനങ്ങളുടെ അനുഗ്രഹവും ഞങ്ങളോടൊപ്പമുണ്ട്' - ചോദ്യം ചെയ്യലിന് മുമ്പ് മനീഷ് സിസോദിയ ട്വിറ്ററിൽ കുറിച്ചു.