ഹൈദരാബാദ്:ധനുഷിനെ (Dhanush) നായകനാക്കി സംവിധായകൻ അരുൺ മാതേശ്വരൻ ഒരുക്കുന്ന പാൻ -ഇന്ത്യൻ ചിത്രമാണ് 'ക്യാപ്റ്റൻ മില്ലർ' (Captain Miller). സിനിമ പ്രേമികൾ ആകാംക്ഷയോടെ കാത്തിരിക്കുന്ന ചിത്രത്തിന്‍റെ ടീസർ ജൂലൈ 28ന് പുറത്തുവിടുമെന്ന് അറിയിച്ചിരിക്കുകയാണ് അണിയറ പ്രവർത്തകർ. തെന്നിന്ത്യയുടെ പ്രിയ നടൻ ധനുഷിന്‍റെ പിറന്നാൾ ദിനമാണ് ജൂലൈ 28ന്. താരത്തിന് പിറന്നാൾ സമ്മാനമായി ടീസർ പുറത്തിറക്കാനാണ് അണിയറക്കാർ പദ്ധതിയിടുന്നത്.
ഇതിനിടെ ബിഗ് ബജറ്റ് ആക്ഷൻ പീരിയഡ് ഡ്രാമയായി ഒരുങ്ങുന്ന ചിത്രത്തിന്‍റെ പുതിയ പോസ്റ്ററും പുറത്തുവന്നു. ധനുഷിനെയും കന്നഡ നടൻ ശിവ രാജ്‌കുമാറിനെയുമാണ് (Shiva Rajkumar) പോസ്റ്ററില്‍ കാണാനാവുക. യുദ്ധ രംഗത്തിന്‍റെ പശ്ചാത്തലത്തിൽ ആയുധങ്ങളുമേന്തി നിൽക്കുകയാണ് ധനുഷും ശിവ രാജ്‌കുമാറും. ഏറെ കൗതുകവും ആകാംക്ഷയും ഉണർത്തുന്ന പോസ്റ്ററിന് മികച്ച പ്രതികരണമാണ് സിനിമാസ്വാദകരിൽ നിന്നും ലഭിക്കുന്നത്.
സിനിമയുടെ നിർമാതാക്കൾ ട്വിറ്ററിലൂടെയാണ് ധനുഷും ശിവ രാജ്‌കുമാറും അണിനിരക്കുന്ന പുതിയ പോസ്റ്റർ പുറത്ത് വിട്ടത്. യുദ്ധക്കളത്തിൽ ഇരുവരും പരസ്‌പരം പുറം തിരിഞ്ഞ് നിൽക്കുകയാണ് പോസ്റ്ററില്‍. പശ്ചാത്തലത്തിൽ യുദ്ധവും വെടിവെപ്പുമെല്ലാം കാണാം.
ചിത്രത്തിൽ സുപ്രധാന വേഷത്തിലാകും ശിവ രാജ്‌കുമാർ എത്തുക എന്നാണ് സൂചന. നേരത്തെ ഒരു അഭിമുഖത്തിൽ ധനുഷിനൊപ്പം ജോലി ചെയ്യുന്നതിനെക്കുറിച്ച് കന്നഡ താരം മനസ് തുറന്നിരുന്നു. താൻ ധനുഷിന്‍റെ വലിയ ആരാധകൻ ആണെന്നും ധനുഷിൽ തന്നെത്തന്നെയാണ് കാണുന്നതെന്നും അദ്ദേഹം പറഞ്ഞിരുന്നു.
'ഞാൻ ധനുഷിന്‍റെ ഒരു വലിയ ആരാധകനാണ്. ഞാൻ അദ്ദേഹത്തിന്‍റെ എല്ലാ സിനിമകളും കണ്ടിട്ടുണ്ട്. സത്യത്തിൽ, ധനുഷിൽ ഞാൻ എന്നെത്തന്നെയാണ് കാണുന്നത്! വികൃതികളിലും സുഹൃത്തുക്കളോട് പെരുമാറുന്ന രീതിയിലും എല്ലാം അവൻ എന്നെപ്പോലെയാണ്, അല്ലെങ്കിൽ ഞാൻ അവനെപ്പോലെയാണ്! എനിക്ക് ധനുഷിനോട് ഒരു പ്രത്യേക ഇഷ്‌ടമുണ്ട്. അദ്ദേഹവുമായി സ്‌ക്രീൻ പങ്കിടാനുള്ള അവസരം പാഴാക്കാൻ എനിക്ക് കഴിയില്ല'- എന്നായിരുന്നു ശിവ രാജ്‌കുമാറിന്‍റെ വാക്കുകൾ.