അമർത്യ സെന്നിന്‍റെ ശാന്തിനികേതനിലെ ഭൂമി ഒഴിയണമെന്ന നോട്ടിസ്; വിശ്വഭാരതി സർവകലാശാലയുടെ നീക്കത്തിന് കൊൽക്കത്ത ഹൈക്കോടതിയുടെ സ്റ്റേ

ഭൂമി കയ്യേറിയതാണെന്ന് ആരോപിച്ച് വിശ്വഭാരതി സർവകലാശാല നൽകിയ നോട്ടിസിനെതിരെ കൊൽക്കത്ത ഹൈക്കോടതി സ്റ്റേ പുറപ്പെടുവിച്ചു. മെയ് ആറിനകം അമർത്യ സെൻ ഭൂമി ഒഴിഞ്ഞില്ലെങ്കിൽ ബലപ്രയോഗത്തിലൂടെ ഒഴിപ്പിക്കുമെന്നായിരുന്നു നോട്ടിസ്.

കൊൽക്കത്ത : നൊബേൽ ജേതാവായ സാമ്പത്തിക ശാസ്ത്രജ്ഞൻ അമർത്യ സെന്നിന്‍റെ ശാന്തിനികേതനിലെ ഭൂമി ഒഴിയണമെന്ന വിശ്വഭാരതി സർവകലാശാലയുടെ നീക്കത്തിന് കൊൽക്കത്ത ഹൈക്കോടതിയുടെ സ്റ്റേ. ജസ്റ്റിസ് ബിഭാസ് രഞ്ജൻ ഡെയുടെ ബെഞ്ചാണ് കേസ് പരിഗണിച്ചത്. ബിർഭും ജില്ലയിലെ കീഴ്‌ക്കോടതിയിൽ വാദം കേൾക്കുന്നത് വരെ ഭൂമി ഒഴിയണമെന്ന നോട്ടിസിന് ഇടക്കാല സ്റ്റേ പുറപ്പെടുവിക്കുകയായിരുന്നു.

ഭൂമി കയ്യേറിയതാണെന്ന് ആരോപിച്ച് സർവകലാശാല നൽകിയ നോട്ടിസിനെതിരെ അമർത്യ സെൻ ഹൈക്കോടതിയെ സമീപിച്ചിരുന്നു. മെയ് ആറിനകം സെൻ ഭൂമി ഒഴിഞ്ഞില്ലെങ്കിൽ 1971ലെ കേന്ദ്ര ഭൂനിയമ പ്രകാരം ബലപ്രയോഗത്തിലൂടെ അദ്ദേഹത്തെ ഒഴിപ്പിക്കേണ്ടി വരുമെന്ന് അറിയിച്ചുകൊണ്ടായിരുന്നു വിശ്വഭാരതി സർവകലാശാല അദ്ദേഹത്തിന് നോട്ടിസ് അയച്ചത്. പശ്ചിമ ബംഗാളിലെ ശാന്തിനികേതനിലെ അമർത്യ സെന്നിന്‍റെ 'പ്രതിചി' എന്ന വീടിരിക്കുന്ന സ്ഥലത്ത് വിശ്വഭാരതി സർവകലാശാലയുടെ 13 സെന്‍റ് സ്ഥലം അനധികൃതമായി കൈവശപ്പെടുത്തി എന്നാണ് അദ്ദേഹത്തിന് എതിരെയുള്ള ആരോപണം.

ഭൂമി അമർത്യ സെൻ കയ്യേറിയെന്നും സമയപരിധിക്കുള്ളിൽ സ്ഥലം വിട്ടുനൽകിയില്ലെങ്കിൽ സാമ്പത്തിക വിദഗ്‌ധനായ അമർത്യ സെന്നിനെ ഒഴിപ്പിക്കുമെന്നും നോട്ടിസിൽ വിശ്വഭാരതി വ്യക്തമാക്കിയിരുന്നു. ജനുവരി 24നാണ് വിശ്വഭാരതി ഭൂമി വിട്ടുനൽകണമെന്ന് ആവശ്യപ്പെട്ട് സെന്നിന് ആദ്യ നോട്ടിസ് അയച്ചത്. പിന്നീട് രണ്ട് നോട്ടിസ് കൂടി അയച്ചു.

ജനുവരിയിൽ ലഭിച്ച നോട്ടിസിന് ഏപ്രിൽ 19ന് കൈവശപ്പെടുത്തിയ ഭൂമിയുടെ കാര്യത്തിൽ അന്തിമ തീരുമാനം എടുക്കണമെന്നായിരുന്നു നിർദേശം. എന്നാൽ ഏപ്രിൽ 17ന് അമർത്യ സെൻ വിശ്വഭാരതിക്ക് മറുപടി അയച്ചു. 80 വർഷമായി ഭൂമിയുടെ ഉപയോഗം അതേപടി തുടരുന്നുവെന്നും പാട്ടത്തിന്‍റെ കാലാവധി തീരുന്നത് വരെ ഭൂമിയിൽ ആർക്കും അവകാശവാദം ഉന്നയിക്കാനാവില്ലെന്നുമായിരുന്നു മറുപടി കത്തിന്‍റെ ഉള്ളടക്കം.

1943ൽ അമർത്യ സെന്നിന്‍റെ പിതാവ് അശുതോഷ് സെൻ വിശ്വഭാരതിയിൽ നിന്ന് ഭൂമി പാട്ടത്തിനെടുത്തു. അദ്ദേഹത്തിന്‍റെ മരണശേഷം അപേക്ഷയുടെ അടിസ്ഥാനത്തിൽ 2006 നവംബർ ഒമ്പതിന് അമർത്യ സെൻ ഈ ഭൂമി പാട്ടത്തിനെടുത്തു. അമർത്യ സെന്നിന്‍റെ ഉടമസ്ഥതയിലുള്ള ഭൂമി 1.25 ഏക്കറാണ്. എന്നാൽ തങ്ങളുടെ ഭൂമി കൂടി ചേർത്ത് 1.38 ഏക്കറിന്‍റെ ഉടമയാണെന്നാണ് അദ്ദേഹം അവകാശപ്പെടുന്നത് എന്നാണ് വിശ്വഭാരതിയുടെ ആരോപണം. പ്രൊഫസർ അമർത്യ സെന്നിന് ഭൂമി വിഷയത്തിൽ ഒരുപാട് സമയം അനുവദിച്ചിരുന്നതായും നേരിട്ട് ഹാജരാകാൻ ആവശ്യപ്പെട്ട സമയത്ത് അങ്ങനെ ചെയ്യുകയോ പ്രതിനിധിയെ അയക്കുകയോ ചെയ്‌തില്ലെന്നും സർവകലാശാല അധികൃതർ വ്യക്തമാക്കി.

വിഷയത്തിൽ വിശ്വഭാരതി വൈസ് ചാൻസലർ ബിദ്യുത് ചക്രവർത്തി അമർത്യ സെന്നിനെ വ്യക്തിപരമായി അധിക്ഷേപിച്ചത് വലിയ വിവാദങ്ങൾ സൃഷ്‌ടിച്ചു. സംഭവത്തിൽ മുഖ്യമന്ത്രി മമത ബാനർജി അമർത്യ സെന്നിനെ പിന്തുണച്ച് രംഗത്തെത്തിയിരുന്നു. ഇതുമായി ബന്ധപ്പെട്ട കേസ് ബോൾപൂർ സബ് ഡിവിഷണൽ മജിസ്ട്രേറ്റ് കോടതിയുടെ പരിഗണനയിലാണ്. കേസ് തീർപ്പാക്കുന്നത് വരെ 'പ്രതിചി' വീടിന്‍റെ പരിസരത്ത് ക്രമസമാധാനം നിലനിർത്തണമെന്നാണ് ശാന്തിനികേതൻ പൊലീസിന് മജിസ്ട്രേറ്റ് നൽകിയ നിർദേശം.